Gazdy únemdeýge JI kómektesedi: 1,3 mln smart-eseptegish ornatylady
ASTANA. KAZINFORM — Bul týraly Energetıka mınıstrligi Gaz ónerkásibi departamentiniń dırektory Asqar Qonaqbaev málimdedi.
— Buǵan deıin tutynýshy turǵyn úıin gazdandyrý úshin tehnıkalyq shart alýǵa ótinish berý maqsatynda gaz sharýashylyǵyna baratyn. Qazir bul qyzmet tsıfrlandyryldy. Endi ony eGov arqyly alýǵa bolady, — dedi Asqar Qonaqbaev Astanada ótken GASTHERM halyqaralyq kórmesi aıasynda.
Gaz salasy da tsıfrlandyrý men jasandy ıntellekt múmkindikterin paıdalana bastady. Buǵan deıin mamandar tutynýshynyń úıine baryp, derekterdi qolmen tirkeıtin. Endi bul protsess avtomattandyrylady.
Elimizde Aqyl Energy jobasy aıasynda mehanıkalyq eseptegishter smart-qurylǵylarǵa aýystyrylady.
Asqar Qonaqbaevtyń aıtýynsha, tsıfrlyq esepteý quraldary gaz tutyný týraly málimetterdi qashyqtan alýǵa múmkindik beredi.
— Qazir ulttyq operatordyń aldynda shamamen 1,3 mıllıon eseptegishti aýystyrý mindeti tur. Jumys bastalyp ketti. Búginde shamamen 50 myń eseptegish aýystyryldy. Bul jumys ári qaraı da jalǵasady, — dedi ol.
Jańa júıeni otandyq mamandar ázirlegen. Ol 15 jyl boıy jınalǵan derekterdi taldaıdy, tipti ashyq qalǵan gazdy boljap, der kezinde belgi beredi.
— Qazir mobıldi qosymsha arqyly qarapaıym azamattar kúndelikti qansha gaz tutynǵanyn kóre alady. Adam óz shyǵynyn kún saıyn baqylasa, gazdy únemdeýge tyrysady. Buryn eseptegish syrtta tursa, ony qaraı bermeıdi ǵoı. Al telefonǵa kún saıyn habarlama kelip tursa, tutynýshy óziniń gazdy qanshalyqty paıdalanǵanyna nazar aýdara bastaıdy, — deıdi Aqyl energy jobasynyń jetekshisi Damır Ýlamov.
Aıta keteıik, Memleket basshysy 2035 jylǵa qaraı bul kórsetkishti 80 paıyzǵa jetkizýdi tapsyrdy. Bul mejege jetý úshin gaz óndirisin arttyryp, jańa magıstraldyq qubyrlar salyp, eskirgen jelilerdi jańartý qajet.
Aıta ketelik gazdandyrý deńgeıin 80% jetkizý tarıfke qalaı áser etetini týraly jazǵan edik.
