Gazdy esepke alýdyń biryńǵaı tsıfrlyq júıesi qalyptastyrylady — zań jobasy
ASTANA. KAZINFORM — Tutynylǵan gazdy eseptegish quraldardy aýystyrý gaz jetkizýshilerdiń qarajaty esebinen júzege asyrylmaq. Bul týraly Májilistiń jalpy otyrysynda gazben jabdyqtaý jáne gazdy únemdi tutyný máseleleri boıynsha zań jobasyn tanystyrǵan depýtat Edil Jańbyrshın aıtty.
— Taǵy bir mańyzdy másele — ol gaz tutynýdy esepke alýdyń dál emestigi. Qazirgi ýaqytta 2,1 mln tutynýshynyń eseptegish quraldarynyń kórsetkishteri baqylaýshylar tarapynan qolmen alynady nemese tutynýshylar eseptegish kórsetkishin fotoǵa túsirip, messendjerlermen jiberedi. Abonentterdiń bir bóligi keıde úıinde bolmaıdy nemese eseptegish quraldarǵa qoljetimdilik bermeıdi. Bul eseptiń tolyq ári naqty júrgizilýine kedergi keltiredi, — dedi Edil Jańbyrshın.
Onyń dereginshe, QazaqGaz Aimaq júıesindegi 1,9 mln abonenttiń tek 100 myńy ǵana derekterdi qashyqtan beretin eseptegish quraldarmen jabdyqtalǵan.
— Osyǵan baılanysty derekterdi qashyqtan beretin eseptegish quraldarǵa kezeń-kezeńimen kóshý, gazdy esepke alýdyń biryńǵaı tsıfrlyq júıesin qalyptastyrý usynylady. Bul rette eseptegish quraldardy aýystyrý gaz jetkizýshilerdiń qarajaty esebinen júzege asyrylady. Gaz salasynda osyndaı normalardyń qabyldanýy áleýmettik ádilettilikti qamtamasyz etip, qalpyna kelmeıtin resýrsty paıdalanýdyń tıimdiligin arttyrýǵa múmkindik beredi. Sonymen qatar turǵyndardyń tólemderin jáne gazdy únemdeıdi, al únemdelgen gaz resýrstary óndiriske jáne gazdandyrylmaǵan eldi-mekenderdi kógildir otynmen qamtamsyz etilýge baǵyttalady, — dedi depýtat.
Aıta keteıik, taýarlyq gazdy únemdep paıdalaný mádenıetin qalyptastyrýǵa, sondaı-aq jeke jáne kommýnaldyq tutynýshylar úshin saralanǵan tarıf saıasatyn qurýǵa baǵyttalǵan zań jobasyna qatysty Edil Jańbyrshın Kazinform tilshisine suhbat bergen edi.
