Gazdy artyq tutynǵandar qymbatyraq tóleıdi: Senat jańa zań jobasyn maquldady
ASTANA. KAZINFORM – Senat otyrysynda «QR keıbir zańnamalyq aktilerine gazben jabdyqtaý jáne elektr energetıkasy máseleleri boıynsha ózgerister men tolyqtyrýlar engizý týraly» zań jobasy maquldandy. Qujatta gaz tutyný normalaryn engizý, artyq paıdalanǵandarǵa joǵarylatylǵan tarıf qoldaný, gaz jetkizýdegi deldaldardy qysqartý jáne salany tsıfrlandyrý sharalary qarastyrylǵan.
Senat depýtaty Súıindik Aldashevtyń aıtýynsha, zań Memleket basshysynyń gaz tasymaldaý júıesin damytý, gazdy utymdy tutynýdy jáne úzdiksiz gazben jabdyqtaýdy qamtamasyz etý, sondaı-aq salany jedel tsıfrlandyrý jónindegi tapsyrmalaryn oryndaý maqsatynda ázirlengen.
– Bul salada birqatar ózekti máseleler bar. Atap aıtqanda, ınfraqurylymdy jedel jańǵyrtý jáne salý qajettiligi, ishki naryqtyń qajettilikterin óteý úshin gazdy úzdiksiz jetkizýdi qamtamasyz etý, taýarlyq gazǵa baǵa belgileý júıesin reformalaý jáne basqa túıtkilder óz sheshimin kútip tur. Zańda usynylǵan túzetýler elimizdiń energetıkalyq qaýipsizdigin nyǵaıtýǵa, salany memlekettik retteýdiń tıimdiligin arttyrýǵa jáne gazdy utymdy tutynýdy yntalandyrýǵa múmkindik beredi, – dedi depýtat.
Zańda bıýdjet qarajaty esebinen salynǵan gazben jabdyqtaý nysandaryn jergilikti atqarýshy organdardan gaz jáne gazben jabdyqtaý salasyndaǵy ulttyq operatordyń («QazaqGaz» UK» AQ) balansyna óteýsiz berý kózdelgen. Bul norma gazben jabdyqtaý nysandaryn tasymaldaý rásimin jeńildetýge jáne tutynýshylardy úzdiksiz gazben qamtý úshin olardyń tıisti tehnıkalyq qyzmet kórsetýine múmkindik beredi.
– Gaz taratý júıelerin magıstraldyq gaz qubyryna mindetti túrde qosý kózdelgen. Taýarlyq gazdy gaz taratý júıesi arqyly eki jáne odan da kóp gaz taratý uıymdarynyń tasymaldaýyna tyıym salynady. Bul túzetýler artyq deldaldardy alyp tastaý arqyly gaz taratý uıymdarynyń qyzmet tıimdiligin arttyrady, – dep atap ótti S. Aldashev.
Taǵy bir túzetýler blogy avtogaz quıý stantsııalaryn paıdalaný qaýipsizdigin arttyrýǵa jáne suıytylǵan munaı gazy aınalymyn retteýge arnalǵan.
Atap aıtqanda:
- Avtogaz quıý stantsııalaryn suıytylǵan munaı gazyn jerústi rezervýarlarynda saqtaýdan jerasty rezervýarlarynda saqtaýǵa kóshirý;
- Kólik quraldary men turmystyq gaz ballondaryn zańnamada belgilenbegen oryndarda toltyrýǵa tyıym salý;
- Gaz jáne gazben jabdyqtaý salasyndaǵy ýákiletti organ aıqyndaıtyn qaǵıdalarǵa sáıkes, jergilikti atqarýshy organdardyń avtogaz quıý stantsııalarynyń shekti sanyn belgileýi;
- Kóppáterli turǵyn úılerdi jylýmen jabdyqtaý úshin paıdalanylatyn suıytylǵan munaı gazy baǵasyn memlekettik retteý kózdelip otyr.
Sondaı-aq, zańmen gaz jáne gazben jabdyqtaý salasyndaǵy ýákiletti organǵa turmystyq tutynýshylar úshin taýarlyq gazdy tutyný normalaryn esepteý jáne bekitý qaǵıdalaryn aıqyndaý quziretin berý usynylady.
– Belgilengen normalardan asyp ketken jaǵdaıda joǵarylatylǵan koeffıtsıentter qoldanylady. Jalpy alǵanda, bul halyqtyń taýarlyq gazdy paıdalaný tıimdiligin arttyrýǵa múmkindik beredi, – dep túsindirdi senator.
Kommýnaldyq-turmystyq jáne ónerkásiptik tutynýshy uǵymdary taýarlyq gazdy tutyný kóleminiń shegi boıynsha ajyratylady. Bul jańashyldyq taýarlyq gaz tapshylyǵy týyndaǵan jaǵdaıda halyqty úzdiksiz gazben qamtýǵa basymdyq beredi.
– Tsıfrlandyrý aıasynda zańda taýarlyq gazdy esepke alý quraldaryna derekterdi qashyqtan berý múmkindigin qamtamasyz talaptaryn engizý de qarastyrylǵan. Bul túzetýler taýarlyq gazdy esepke alýdyń dáldigi men ashyqtyǵyn qamtamasyz etýge, kórsetkishterdi alý shyǵyndaryn qysqartýǵa jáne adamı faktordy boldyrmaýǵa baǵyttalǵan, – dedi Súıindik Aldashev.
Budan bólek, zańda elektr energetıkasy salasyn damytýǵa baǵyttalǵan birqatar túzetý bar. Atap aıtqanda, gıdroenergetıkany odan ári damytýǵa arnalǵan normalar bekitiledi, onyń ishinde gıdroakkýmýlıatsııalyq elektr stantsııasy uǵymy engizilip, olardy salatyn zańdy tulǵalardy irikteý ólshemsharttary aıqyndalady.
Sondaı-aq jobanyń ótelimdigine qol jetkizilgennen keıin mundaı stantsııalardy tehnıkalyq jaramdy kúıde memleket menshigine óteýsiz berý kózdeledi.
Qujatta elektr energııasyn berý qyzmetin júzege asyrýǵa arnalǵan lıtsenzııanyń jańa túrin engizý, lıtsenzııalaý tártibin reglamentteý, sondaı-aq berilgen lıtsenzııalarǵa qatysty ruqsattyq baqylaýdy engizý jáne basqa da sharalar qarastyrylǵan.
Zań jobasy birinshi jáne ekinshi oqylymda maquldandy.
Buǵan deıin Senat «Qazaqstan Úkimeti men Ózbekstan Úkimeti arasyndaǵy Qazaqstan – Ózbekstan memlekettik shekarasynyń rejımi týraly kelisimdi ratıfıkatsııalaý týraly» Zańdy maquldaǵan edi.
