Gazdandyrý jáne aıyppul: Almaty oblysynda ekologııa máseleleri qalaı sheshiledi
QONAEV. KAZINFORM — Almaty oblysyndaǵy Jylý-elektr ortalyǵy 2026 jylǵa deıin gaz otynyna kóshedi.
Almaty oblysy boıynsha Ekologııa departamentiniń basshysy Qonysbek Baıedilov 2024 jyldyń qorytyndylarymen bólisip, ótken jyly departament tarapynan barlyǵy 129 tekserý júrgizilgenin atap ótti.
— Tekserýler barysynda 300-den astam ekologııalyq zańbuzýshylyqtar anyqtalyp, 6 mlrd 107 mln teńgege aıyppul salyndy. Sonymen qatar 500-den astam memlekettik qyzmet kórsetýge jobalar qarastyryldy, ekologııalyq máseleler boıynsha jeke jáne zańdy tulǵalardyń 1053 aryz-ótinishteri qarastyryldy, — dedi ol.
Departamenti basshysy óńirdegi ekologııalyq máselelerdi sheshý joldaryna da toqtaldy. Onyń aıtýynsha, Almaty oblysy Іle aýdanynda ornalasqan № 3 Jylý-elektr ortalyǵy jylyna orta eseppen 16-17 myń tonna shyǵaryndyny aýaǵa taratady. Atalǵan ortalyq 2026 jyldyń aıaǵyna deıin gaz otynyna kóshedi dep josparlanǵan.
Sondaı-aq, ol oblystaǵy aýyldardyń gazǵa qosylýy ekologııalyq jaǵdaıdy jaqsartatynyn atap ótti.
— Oblystyń aımaqtyq gazdandyrý kestesine sáıkes, 284 aýyldy mekenderdi gaz otynyna kóshirý kózdelgen. Búgingi kúni 150 nemese jalpy eseptiń 53%-y gazǵa kóshti. Qalǵan 134 aýyldyń gazǵa kóshýi kezeń-kezeńmen 2030 jylǵa deıin josparlanǵan, — dedi Qonysbek Baıedilov.
Eske salaıyq, buǵan deıin Almatyda aýa sapasyn lastaıtyn basty faktorlar qandaı ekenin jazǵanbyz.