Gazdandyrý deńgeıin 80% jetkizý: Tarıf ósýi múmkin be
ASTANA. KAZINFORM — Qazaqstanda kógildir otynǵa qol jetkizgen halyqtyń úlesi jyl saıyn artyp keledi. Qazir el turǵyndarynyń 64 paıyzy tabıǵı gaz tutynady. Al Memleket basshysy 2035 jylǵa qaraı bul kórsetkishti 80 paıyzǵa jetkizýdi tapsyrdy. Bul mejege jetý úshin gaz óndirisin arttyryp, jańa magıstraldyq qubyrlar salyp, eskirgen jelilerdi jańartý qajet. Bul tarıf baǵasyna da áserin tıgizýi múmkin.
Energetıka mınıstrligi gaz ónerkásibi departamentiniń dırektory Asqar Qonaqbaevtyń aıtýynsha, gazǵa qajettilik jyldan-jylǵa artyp keledi. Ásirese, áli de gazǵa qosylmaǵan soltústik-shyǵys óńirlerdi qamtý — negizgi mindetterdiń biri bolyp otyr.
— Mysaly, 2019 jyldan beri tutynýshylar sany shamamen 4 mıllıonǵa kóbeıgen. Ónerkásip pen bıznestiń de suranysy artyp otyr. Qazir elimizde soltústik pen shyǵysta ǵana gazdandyrylmaǵan aımaqtar qaldy. Bul úshin eń aldymen Esil-Astana magıstraldyq gaz qubyry qurylysyn aıaqtaımyz. Oǵan qosa, «Saryarqa» magıstraldyq gaz qubyrynyń ekinshi jáne úshinshi kezekterin aıaqtaý josparlanǵan, — dedi Asqar Qonaqbaev elordada ótken GASTHERM halyqaralyq forýmynda.
Búginde elimizdegi gaz qubyrlarynyń shamamen 33 paıyzy tozǵan. Memleket pen ulttyq operator qoldanystaǵy jelilerdi jańartý jumystaryn istep jatyr.
Bekitilgen ınvestıtsııalyq baǵdarlamalar aıasynda gaz jelileri jańǵyrtylyp, qaıta jańartylady jáne jańa qubyrlar salynady. Atap aıtqanda, eski gaz qubyrlary aýystyrylyp, bolat qubyrlardyń ornyna polıetılen qubyrlar tartylady.
— Tarıfterdiń ósýi eń aldymen qoldanystaǵy ınfraqurylymdy saqtap, ony jańartýǵa jáne odan ári damytýǵa qajet. Qazirgi gaz baǵasy bul jumystardy tolyq kólemde qarjylandyrýǵa múmkindik berip otyr. Sondyqtan tarıftiń ósýi múmkin, alaıda onyń naqty qanshaǵa jáne qashan ósetini týraly qazir aıta almaımyn, — dedi spıker.
Aıta keteıik, sońǵy 6 jylda taǵy 4 mln qazaqstandyq gazǵa qol jetkizdi.
