Gazdan ýlaný azaımaı tur: Túrkistan oblysynda 117 adam zardap shegip, 12-si kóz jumdy
TÚRKІSTAN. KAZINFORM – Túrkistan oblysynda gazdan ýlaný derekteri azaımaı otyr. Bul týraly óńirlik kommýnıkatsııalar qyzmetinde ótken baspasóz máslıhatynda aıtyldy.
QazaqGaz Aimaq AQ Túrkistan óndiristik fılıalynyń dırektory Asqar Shıpekovtyń málimdeýinshe, 2024 jyly gazdan ýlanýǵa qatysty 110 oqıǵa tirkelip, 245 adam zardap shekken. Onyń ishinde 20 adam kóz jumǵan. Al 2025 jyly 112 oqıǵa tirkelip, 284 adamǵa zııan kelip, 17 adam qaıtys bolǵan.
– 2026 jyldyń basynan 16 maýsymǵa deıin 65 oqıǵa tirkeldi. Saldarynan 117 adam zardap shegip, 12 adam qaza tapty. Gazdan ýlaný jaǵdaılary kóbine Saryaǵash, Saıram, Túlkibas, Tólebı jáne Qazyǵurt aýdandarynda tirkelip otyr, – dedi spıker.
Onyń aıtýynsha, gaz tutyný qaýipsizdigin qamtamasyz etý maqsatynda ótken jylytý maýsymynda 16 860 turǵyn úı tekserilgen. Nátıjesinde qaýipsizdik talaptaryn buzýdyń 98 deregi anyqtalyp, zańsyz ornatylǵan gaz peshterin paıdalanǵan 15 tutynýshy gaz júıesinen ajyratylǵan.
Túrkistan oblystyq Tótenshe jaǵdaılar departamenti Memlekettik órt baqylaý basqarmasynyń bastyǵy Meıramhan Kemelhanovtyń sózinshe, 2025-2026 jyldardaǵy jylytý maýsymynda óńirdegi turǵyn úılerde 96 órt oqıǵasy tirkelgen. Saldarynan 8 adam jaraqattanyp, 18 adam qaza bolǵan. Órtten kelgen materıaldyq shyǵyn kólemi 139 mln teńgeden asqan.
Spıkerdiń aıtýynsha, gazdan ýlanýdyń negizgi sebepteri qatarynda murjalardyń tozýy, ýaqytyly tazartylmaýy nemese múlde bolmaýy bar. Sonymen qatar tútin shyǵatyn murjalardy der kezinde teksermeý, gaz-sý jylytqyshtaryn qaýipsizdik talaptaryn buza otyryp jýynatyn bólmelerge ornatý, gaz qurylǵylaryn óz betinshe montajdaý jáne qoldan jasalǵan gaz jabdyqtaryn paıdalaný faktileri jıi kezdesedi.
– Keıbir turǵyndar qaýipsizdik úshin ornatylǵan gazdy avtomatty túrde ajyratý qurylǵylaryn ózderi sóndirip tastaıdy. Mundaı áreketter qaıǵyly jaǵdaılarǵa ákelip otyr, – dedi Meıramhan Kemelhanov.
Resmı málimetke sáıkes, óńirde áleýmettik osal toptarǵa jatatyn turǵyndardyń esepke alynǵan 34 197 úıi bar. Jylytý maýsymy kezinde bul úıler tolyq aralanyp, túsindirý jumystary júrgizilgen. Sondaı-aq 2025-2026 jylǵy jylytý maýsymynda jalpy sany 8 449 qaýipsizdik qurylǵysy ornatylǵan.
Túrkistan oblysynyń energetıka jáne turǵyn úı-kommýnaldyq sharýashylyq basqarmasy basshysynyń orynbasary Janádil Aıtbekovtiń aıtýynsha, búginde óńirdegi 801 eldimekenniń 606-sy tabıǵı gazben qamtylǵan. Jyl sońyna deıin bul kórsetkishti 640 eldimekenge jetkizý josparlanyp otyr.
Buǵan deıin Túrkistan oblysynda turǵyndardyń jańadan tartylǵan gaz jelisiniń sapasyna narazylyq bildirgenin jazǵan edik.
