Gazdalǵan sýsynnan balalar ýlanyp jatqany ras pa
ASTANA. QazAqparat – WhatsApp-ta «Tarhýn» sýsynyn ishkennen keıin ul bala kóz jumǵany jáne gazdalǵan sýsyndardan ózge de balalar ýlanyp jatqany týraly feık aqparat taǵy tarady. QR Densaýlyq saqtaý mınıstrligi Sanıtarııalyq-epıdemıologııalyq baqylaý komıteti aqparatty kezekti ret teriske shyǵardy, dep habarlaıdy QazAqparat stopfake.kz saıtyna silteme jasap.
Habarlamada «Tarhýn» jáne «Sıtro» gazdalǵan sýsyndary ǵana emes, sonymen qatar «M&M’S» drajesi, «Milky way» shokolady, «Dıýshes» pen «Barbarıs» kámpıtteri jáne basqa da birqatar taǵamdar qaýipti dep tanylǵany aıtylǵan.
QR DSM Sanıtarııalyq-epıdemıologııalyq baqylaý komıteti tizimdegi birde-bir ónim qaýipti dep tanylmaǵanyn, sondaı-aq Qazaqstanda gazdalǵan sýsynnan qatty ýlaný jaǵdaılary tirkelmegenin málimdedi.
«QR DSM Sanıtarııalyq-epıdemıologııalyq baqylaý komıteti áleýmettik jelilerde taralǵan azyq-túlik ónimderi týraly aqparat shyndyqqa sáıkes kelmeıtinin jáne feık dep tanylǵanyn habarlaıdy. Sondyqtan jalǵan aqparat taratpaýdy suraımyz jáne tek resmı derekkózden alynǵan aqparatty paıdalanýǵa shaqyramyz», – dedi vedomstvodan.
Aıta keteıik, gazdalǵan sýsyn iship, ýlanǵan balalar týraly habarlama Reseıdiń ınternet-segmentinde 2019 jyly taralǵan bolatyn.
Keıin Qazaqstanǵa jáne basqa da elderge jetti. Ár joly habarlama teriske shyǵarylyp, sýsyndardan qatty ýlaný jaǵdaılary tirkelmegeni habarlanyp otyrdy.
