Gazben júretin kólikterge arnaıy belgi japsyrý usynyldy
NUR-SULTAN. QazAqparat - Qazaqstanda gazben júretin kólikterge arnaıy belgi japsyrý mindettelýi múmkin, dep habarlaıdy QazAqparat tilshisi.
Bul týraly QR Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker aıtty.
«Ázirge eki belginiń eskızi jasaldy. Onyń bireýi avtokóliktiń aldyńǵy terezesine jabystyrylady. Ol parkıngte kirgen jaǵdaıda kórinip turýy kerek. Olardyń jabyq parkıngke kirgenin kúzetshiler nemese beınebaqylaý arqyly bilýge bolady. Kedendik odaqtyń tenıkalyq reglamentterine sáıkes, jol polıtsııasy benzınnen gazǵa aýysqan kóliktiń tehnıkalyq pasportyna arnaıy belgi soǵýy tıis», - dedi komıtet tóraǵasy Ortalyq kommýnıkatsııalar qyzmetinde ótken baspasóz máslıhatynda.
Ekinshi eskız - gazben júretin kólikterdiń jabyq avtoturaqqa kirýine tyıym salatyn belgi bolmaq. Tyıym salý belgisi jabyq avtoturaqtyń kireberisine qoıylady.
V. Bekkerdiń aıtýynsha, ázirge bul belgiler qabyldanǵan joq. Shamamen, 2020 jyldyń ortasynda bekitilýi múmkin.
Aıta keteıik, 2019 jyldyń jeltoqsanynda QR órt qaýipsizdigi erejelerine ózgertýler men tolyqtyrýlar engizgen Úkimet qaýlysy qabyldandy, onda gazben júretin kólikterdiń jabyq parkıngterge kirýine tyıym salyndy.
«QR Ákimshilik quqyqbuzýshylyq týraly» kodeksiniń 410-baby (Órt qaýipsizdigi talaptaryn buzý nemese oryndamaý) boıynsha azamattyq qorǵanys organdary ereje buzǵandarǵa 5 AEK nemese 12 myń teńgeden astam aıyppul sala alady.
