Gazben júretin avtokólikterge aýysýdyń mańyzy zor - Prezıdent

ASTANA. QazAqparat - Qostanaı oblysyna resmı saparmen barǵan Memleket basshysy Nursultan Nazarbaev sheteldik ınvestorlarmen kezdesý barysynda gazben júretin avtokólikterdiń mańyzdylyǵyna toqtaldy, dep habarlaıdy «QazAqparat» HAA tilshisi.

«Álemdegi munaıdyń 30 paıyzyn avtokólikter tutynady. Bizge de munaıdy tezirek satyp, qaıta óńdep otyrý kerek. Osy sebepti Atyraý oblysynda eki birdeı qýatty munaı-hımııa keshenin salyp jatyrmyz. Onyń birinshisi quny 6 mıllıard dollar Qytaı ınvestory salyp jatqan keshen. Ekinshisi - 4 mıllıard dollarlyq. Demek, biz qolda bardy óńdeı bilýimiz kerek. Osy rette gazben júretin avtokólikterge aýysýdyń mańyzy óte zor», - dedi Nursultan Nazarbaev.

Prezıdent sonymen qatar, qazirgi ýaqytta avtoónerkásip salasynda elektromobılder men soǵan sáıkes ınfraqurylymdy damytý basym baǵytqa ıe ekenin atap ótti.

«Bul ınnovatsııalyq kásiporyn (qostanaılyq zaýyt bazasynda elektromobılderdi quraý - avt.), jańa tynys - energııa qýatynyń balamaly kózin tabý, sonymen birge elektromobılderdi quraý. Kóptegen óńirler mundaı avtokólikterge zárý. Sondyqtan, osy salany barynsha damyta bilýimiz kerek», - dedi Memleket basshysy.

Eske salaıyq, búgin jumys saparymen Qostanaıǵa kelgen Elbasy Nursultan Nazarbaev birqatar nysandarda boldy . Atap aıtqanda, Prezıdent «Əýejaı» shaǵynaýdanynda memlekettik baǵdarlamamen salynyp jatqan turǵyn úı qurylysymen tanysty. Shaǵynaýdanda memlekettik-jekemenshik áriptestik aıasynda 900 oryndyq jalpy bilim beretin mektep, sondaı-aq sport jáne oıyn-saýyq kesheniniń qurylysy boı kóterýde.  

Sondaı-aq N.Nazarbaev «SaryarqaAvtoProm» zaýytyna bardy. Búgin «SaryarqaAvtoProm» JShS usaqtúıindi óndiris boıynsha jańa tehnologııalyq ədisti iske qosty. Ədis «monokok» dep atalady. Prezıdentke Peugeot, JAC, Iveco jəne basqa da elektromobılder kórsetildi. 

Sheteldik ınvestorlarmen, zaýyt qyzmetkerlerimen ótken kezdesýden keıin Elbasyna Qostanaı oblysynyń ınvestıtsııalyq əleýeti tanystyryldy.