Gazben jabdyqtaý salasyndaǵy apattyń 70%-y gaz ballonynan bolady

ASTANA. KAZINFORM – Gazben jabdyqtaý salasyndaǵy apattyń 70%-y gaz ballondaryna baılanysty bolady. Bul týraly QR TJM Ónerkásiptik qaýipsizdik komıtetiniń tóraǵasynyń mindetin atqarýshy Rashıd Dýbaev aıtty. 

Spıkerdiń aıtýynsha, gazben jabdyqtaý salasyndaǵy apatqa baılanysty keıingi kezde jarııalanǵan statıstıka alańdaýshylyq týǵyzyp otyr. 

«Oqıǵalardyń negizgi úlesi jylytý kezeńine tıesili: jaǵdaılardyń 70%-y gaz ballondaryna baılanysty problemalar, 25%-y ýly gazben ýlaný jáne 5%-y basqa oqıǵalar», - dedi ol OKQ alańynda ótken baspasóz máslıhatynda.

Sondaı-aq spıker jylytý kezeńinde kóptegen turǵyn turmystyq ballondardy kóshede saqtaıtynyn, keıin olardy suıytylǵan kómirsýtek gazynyń tolyq býlanýyn kútpesten úılerine kirgizip, gaz jabdyqtaryna qosýynan apat bolatynyn aıtty. 

«Búgingi tańda elimizdiń gazıfıkatsııa deńgeıi 59%-dy quraıdy, ıaǵnı 11,6 mıllıon adam gazben qamtamasyz etilgen. Ásirese batys jáne ońtústik aımaqtarda gazıfıkatsııa deńgeıi jaqsy damyǵan, alaıda Soltústik Qazaqstan, Pavlodar jáne Abaı oblystarynda gazıfıkatsııa deńgeıi tómen bolyp otyr», - dedi Rashıd Dýbaev. 

Sonymen qatar ol gaz jabdyqtaý júıelerin paıdalaný kezinde qaýipsizdikti qamtamasyz etý ónerkásiptik qaýipsizdik salasyndaǵy memlekettik saıasattyń eń mańyzdy basymdyqtarynyń biri ekenin atap ótti. 

«Basty mindet – gazdyń úzdiksiz jáne qaýipsiz jetkizilýin qamtamasyz etý, aǵyp ketý, apattar jáne adamdardyń ómirine qaýip tóndiretin jaǵdaılardy barynsha azaıtý. Bul ınfraqurylymdy jańartý, júıeli tekserister júrgizý, qatań standarttardy saqtaý, sondaı-aq mamandar men azamattardy oqytý jáne habardar etý sııaqty keshendi tásildi talap etedi», - dep túıdi sózin Rashıd Qultaıuly.