Gazben qamtamasyz etý týraly arnaıy baǵdarlama jáne zań kerek - E. Imanqulov
ASTANA. Maýsymnyń 4-i. QazAqparat /Qanat Mámetqazyuly/ -Qazaqstanda gaz jáne gazben qamtamasyz etý máselelerin qamtyǵan arnaıy baǵdarlama jáne zań kerek.
Bul týraly búgin QR Parlamenti Senatynda elimizdegi gaz salasyn damytý jáne óńirlerdi gazdandyrý máselesine arnalǵan Úkimet saǵatynda senator Edilbaı Imanqulov málim etti, dep habarlaıdy QazAqparat.
Sóz arasynda depýtat E. Imanqulov osy ýaqytqa deıin óńirlerdi gazben qamtamasyz etý problemalary jóninde eki márte saýal joldaǵanyn, al ondaı saýaldarda tek problemalar ǵana emes, naqty usynystar aıtylǵanyn atap ótti.
«Birinshiden, elimizdegi gaz salasyn damytýdyń jańa memlekettik baǵdarlamasyn ázirleý qajettigi týyndap otyr, bul rette depýtattardy qatystyra otyryp atalǵan sharamen aınalysatyn komıssııa qurylǵany abzal. Onda suıytylǵan gazdy óndirý men qamtamasyz etý júıesin qurý, gazdyń magıstraldy tasymalyn damytý sharalary qarastyrylýy kerek. Ekinshiden, 2010 jyly Aqtóbe jáne Aqmola oblysynyń eki eldi mekenin suıytylǵan gazben derbes jylytý jónindegi eki ilki joba júzege asyrylǵany oryndy. Úshinshiden, Qazaqstan Respýblıkasyndaǵy gaz jáne gazben qamtamasyz etý týraly zań jobasy ázirlenip, qabyldanýy tıis. Qujatta elimizdiń aýyl-aımaqtaryn gazben senimdi qamtamasyz etýdiń quqyqtyq negizderi qalyptastyrylyp, óndiriletin gazdy tıimdi paıdalaný, ony motor otyny jáne hımııalyq ónerkásiptegi shıkizat retinde paıdalaný tetikteri úshin quqyqtyq jaǵynan qamtý sharalary kózdelýi kerek», dedi E. Imanqulov.
Depýtattyń aıtýynsha, qazirgi tańda gazdandyrý máselesi boıynsha birqatar sharalar, sondaı-aq ilki jobalar is júzinde júzege asyrylmaı otyr.
«El ekonomıkasynyń barlyq salalary arasynda munaıgaz ónerkásibi tipti daǵdarys kezeńiniń ózinde qarqyndy damý úrdisin kórsetti. Alaıda, munaıgaz keshenindegi gaz salasy biregeı júıe retinde emes, jeke-dara baǵyt retinde qarastyrýdy talap etedi», dedi senator.
