Gazanyń 900-ge jýyq turǵyny tamaq izdep júrip, mert boldy - BUU

ASTANA. KAZINFORM – BUU Adam quqyqtary jónindegi Joǵary komıssary basqarmasynyń málimetteri boıynsha, mamyr aıynyń sońynda Gazada gýmanıtarlyq kómekke qol jetkizbek bolǵan keminde 875 adam mert boldy.

Olardyń kópshiligin – 614 adamdy Gazanyń gýmanıtarlyq qory (GHF) uıymdastyrǵan azyq-túlik taratatyn orynda atyp óltirgen. Taǵy 201 adam BUU men onyń seriktesteri uıymdastyrǵan baǵyt boıynda azyq-túlikke qol jetkizbek bolyp júrip, kóz jumdy.

Sońǵy oqıǵa Ash-Shakýsh aýdanynda boldy, onda azyq-túlik alýǵa kelgen palestınalyqtarǵa Izraıl sarbazdary oq jaýdyrǵan. Eki adam mert bolyp, toǵyz adam jaraqattandy.

Gýmanıtarlyq kómek shekarada turyp qaldy

BUU-nyń palestınalyq bosqyndarǵa kómek jónindegi agenttigi gýmanıtarlyq kómekti Gazaǵa tórt aıdan beri jetkize almaı jatqandyqtaryn málimdedi.

Mysyr men Iordanııa shekarasynda qoldaný merzimi ótýge taıaý qalǵan azyq-túlik pen medıtsınalyq zattar tıelgen 6 myń júk kóligi tur.

Batys jaǵalaý: «Únsiz soǵys órship barady»

Okýpatsııalanǵan batys jaǵalaýda Izraıl áskerıleri men qonystanýshylar tarapynan zorlyq-zombylyq kúsheıip keledi. Beıbit turǵyndar qaza bolyp jatyr, olardyń arasynda eki jastaǵy qyz egde jastaǵy er adam bar.

BUU málimetteri boıynsha, jyl basynan beri Izraıldiń «Temir qabyrǵa» operatsııasynyń saldarynan 30 myńǵa jýyq palestınalyq baspanasyn tastap ketýge májbúr boldy. Úıler súrilip, júrip-turýǵa shekteý qoıylyp jatyr, keıdeılik pen jumyssyzdyq ósip keledi.

BUU ókilderi Batys jaǵalaýdaǵy májbúrlep kóshirý kólemi 1967 jyldan keıingi eń irisi bolyp otyrǵandyǵyn eskertti. Mundaı áreketter áskerı qylmys jáne etnıkalyq «tazalaý» bolyp baǵalanýy yqtımal.

Osyǵan deıin HAMAS-tyń Gazaǵa arnalǵan gýmanıtarlyq kómek qoryn joıýdy talap etkeni týraly jazdyq.