Gazaǵa gýmanıtarlyq kómek tasymaldaǵan kemege shabýyl jasaldy
ASTANA.KAZINFORM — Quqyq qorǵaýshylardyń halyqaralyq koalıtsııasy kómek kórsetý mıssııasyn buzý maqsatynda kemege áýe shabýyly jasalǵanyn habarlady, dep habarlaıdy Kazinform tilshisi.
Gaza sektoryna bet alǵan gýmanıtarlyq kómek júktelgen kemege juma kúni tańerteń Malta jaǵalaýynda dronmen shabýyl jasaldy. Bul týraly «The Freedom Flotilla Coalition» halyqaralyq úkimettik emes uıymy habarlady.
Koalıtsııa óz kemeleriniń birinde bolǵan órttiń vıdeosyn jarııalap, Izraıldi aıyptady.
ÚEU kemeniń Maltaǵa bet alǵanyn, oǵan belsendiler toby minip, keıin olar Gaza sektorynyń jaǵalaýyna barýdy josparlaǵanyn aıtty. Maltada kemege minýge josparlaǵandardyń arasynda ekologııalyq belsendi Greta Týnberg pen AQSh armııasynyń otstavkadaǵy polkovnıgi Merı Enn Raıt boldy.
— Josparlanǵan jóneltý kúni tańerteń kemege shabýyl jasaldy. Uıymnyń habarlaýynsha, qarýly drondar qarýsyz kemeniń aldyńǵy bóligine eki ret shabýyl jasap, saldarynan órt shyqqan, — dep habarlady uıym.
BREAKING: At 00:23 Maltese time, a #FreedomFlotilla ship was subjected to a drone attack. The front of the vessel was targeted twice, resulting in a fire and a breach in the hull. The ship is currently located in international waters near #Malta. An #SOS distress signal was sent. pic.twitter.com/J6oEQafuOb
— Freedom Flotilla Coalition (@GazaFFlotilla) May 2, 2025
«Bostandyq flotılııasy koalıtsııasy» áleýmettik jelide kemede 30 halyqaralyq quqyq qorǵaýshy bolǵandyqtan, sýǵa batyp ketý qaýpi bar ekenin aıtty.
Keme Maltadan shyǵysqa qaraı baǵyt alǵanda apat sıgnaly qosylǵan.
— Malta úkimeti teńiz bıligine jergilikti ýaqyt boıynsha tún ortasynan aýǵanda órt týraly qońyraý túskenin aıtty. Keme aýmaqtyq sýlardan tys jerde bolǵan jáne bortynda 12 ekıpaj múshesi men tórt beıbit turǵyn bolǵan, — dep habarlady Malta úkimeti.
Oqıǵa ornyna býksır qaıyǵy attanyp, órtti sóndirýge kiristi. Shabýylǵa ushyraǵan kemege Malta patrýldik kemesi de jóneltildi.
— Barlyq ekıpaj múshesi qaýipsiz jerde, biraq býksırge shyǵýdan bas tartty. Keme ishindegi órtti sóndirýge kómek kórsetildi, — delingen Malta úkimetiniń málimdemesinde.
«Bostandyq flotılııasy koalıtsııasy» úkimettik emes uıymy ózin Izraıldiń Gaza sektoryn blokadasyn toqtatý jáne qorshaýdaǵy anklavqa zorlyq-zombylyqsyz tikeleı áreket arqyly gýmanıtarlyq kómek jetkizý úshin jumys isteıtin Palestınany qoldaıtyn belsendilerdiń halyqaralyq jelisi retinde sıpattaıdy.
— Izraıl elshileri shaqyrylyp, halyqaralyq quqyqty buzǵany úshin, halyqaralyq sýlarda azamattyq kemeni bombalaǵany úshin jaýap berýi kerek, — delingen habarlamada.
Izraıl bul aıypqa qatysty pikir bildirgen joq.
2023 jyldyń 7 qazanynan beri HAMAS-tyń Izraılge shabýylynan jáne Gaza sektorynda soǵys bastalǵannan beri Palestına anklavy Izraıldiń áskerı qorshaýynda boldy.
2025 jyldyń 2 naýryzynda Izraıl anklavty tolyq gýmanıtarlyq blokadaǵa salyp, eki mıllıonnan astam palestınalyqtarǵa azyq-túlik, dári-dármek jáne basqa da mańyzdy kómek kórsetýdi toqtatty.
Aıta ketelik Anklavta eki kún ishinde 90-nan astam adam qaza tapty.