Gazaǵa arnalǵan gýmanıtarlyq júk tıelgen «Global Sýmýd» flotılııasy Barselonaǵa oraldy
ASTANA. KAZINFORM – Uıymdastyrýshylar aýa raıynyń qolaısyzdyǵyna baılanysty mıssııany keıinirek júzege asyratyndaryn aıtty. Izraıl bıligi mıssııa qatysýshylaryn tutqyndaımyz dep qorqytty.
Bul týraly euronews habarlady.
Ondaǵy málimetterge qaraǵanda, Gazaǵa bet alǵan «Global Sýmýd» flotılııasy jaǵalaýdan ketken soń birneshe saǵattan keıin Barselonaǵa qaıtýǵa májbúr boldy.
Quramynda belsendiler, tanymal adamdar men 44 memlekettiń ókilderi bar 20 keme Ispanııa qalasynan jeksenbi kúni shyqqan edi. Olardy shyǵaryp salýǵa palestınalyq qozǵalysty qoldaıtyn myńdaǵan adam keldi.
Uıymdastyrýshylar gýmanıtarlyq júkti Gazaǵa jetkizýge aýa raıy kedergi bolǵanyn aıtty. Olar keri qaıtý týraly sheshimdi qaýipsizdik maqsatynda qabyldaǵan. Jeldiń jyldamdyǵy teńizde saǵatyna 56 km-ge jetken. Al mundaı jaǵdaı shaǵyn kemeler úshin qaýipti.
Osy sapardyń aldynda Ispanııanyń meteorologtary Katalonııa men eldiń jaǵalaýdaǵy ózge de óńirlerinde nóser jaýyn jaýyp, daýyl turatynyn eskertken.
Osylaısha, kemeler jolǵa shyqpaı qaldy, endi sapardyń qashan uıymdastyrylatyny belgisiz.
Izraıl bıligi bolsa flotılııany toqtatyp, onyń qatysýshylaryn tutqyndaıtyndaryn aıtyp, qorqytty. Izraıl qaýipsizdik mınıstri Itaman Ben-Gvırdiń aıtýynsha, bul mıssııa Izraıl memleketiniń egemendigine nuqsan keltirip, HAMAS uıymyn qoldaý dep tanylady.
Ol belsendilerdiń tutqyndalyp, terrorısterge arnalǵan túrmege qamalatynyn, al kemeler tárkilenetinine ýáde berdi.
Izraıldiń anklavtaǵy teńiz blokadasyn buzýǵa umtylǵandardyń ishinde eń irisi sanalatyn bul flotılııa quramynda shvetsııalyq ekobelsendi Greta Týnberg pen Ada Kolaý jáne Barselona meri bar bolatyn.
Aktsııany «Oskar» syılyǵynyń laýreaty aktrısa Sıýzan Sarandon men «Taqtar oıyny» serıalynyń aktery Lıam Kannıngem de qoldady.
Gazaǵa baǵyttalǵan flotılııanyń alǵashqy áreketi ótken aıda azyq-túlik sarapshylary ashtyq jaqyn ýaqytta apatty deńgeıge jetýi múmkin dep eskertkennen keıin jasaldy.
Gazanyń densaýlyq saqtaý mınıstrliginiń (HAMAS baqylaýyndaǵy) derekterine sáıkes, búgingi kúnge deıin ashtyqtan 340 palestınalyq, sonyń ishinde 124 bala kóz jumǵan.
Vedomstvonyń málimetinshe, 23 aıǵa jýyq soǵys barysynda Gazada 63 myńnan astam palestınalyq qaza tapqan. Bul sanaqta beıbit turǵyndar men qarýly top músheleri bólek kórsetilmeıdi.
Osyǵan deıin shvetsııalyq ekobelsendi Greta Týnbergtiń 31 tamyz kúni Ispanııanyń Barselonasynan Gaza sektoryna shyǵatyn jańa «kómek flotılııasyna» qatysatynyn rastaǵany týraly jazǵan edik.