Gazadan tutqyndardyń besinshi tobyn bosatý bastaldy
Gaza sektorynda palestınalyq HAMAS toby Qyzyl krest halyqaralyq komıtetiniń (HQKK) ókilderine tutqynǵa alynǵan adamdardyń besinshi legin tapsyrý protsesin bastady. Bul týraly «Al-Kahıra al-Ihbarııa» telearnasyna silteme jasap TASS jazdy, dep habarlaıdy Kazinform
Telearnanyń málimetinshe, bul – gýmanıtarlyq bitim týraly kelisim kúshine engeli bergi bostandyqqa jiberilip jatqan tutqyndardyń besinshi toby. Bul joly 10 adamdy erkine qoıa berý josparlanǵan.
Mysyr men Katardyń aralasýynan keıin ızraıldik kúshter men palestınalyq qarsylasý jasaqtarynyń Gaza sektoryndaǵy ýaqytsha bitim týraly kelisimin taǵy eki kúnge sozýǵa múmkin boldy. Kelisim merzimi ótken kúni aıaqtalýy tıis edi.
Osydan birshama ýaqyt buryn HAMAS palestınalyq qozǵalysynyń áskerı qanaty – «Izzeddına al-Kassama brıgadasynyń» ókili Abý Ýbaıda málimdeme jasap, «qarsylastar bitim kelisimin ustanatyn bolsa», olar da soǵan beıildi ekenin atap ótti. Onymen qosa, ol araǵaıyn ókilderin Izraılge qysyp jasap, «aýadaǵy jáne jerdegi bitim týraly kelisimniń barlyq sharttaryn ustanýǵa» shaqyrýǵa úndedi.
Jospar boıynsha, tutqyndar buǵan deıingi mámilege sáıkes bosatylady, ıaǵnı erkindikke jiberilgen árbir ızraıldik úshin – úsh palestınalyq tutqyn.
Aıta keteıik, 22 qarashada Izraıl men HAMAS tutqyndardy bosatýǵa, soǵysty ýaqytsha toqtatýǵa keliskenin jazdyq.
Tórtkúndik gýmanıtarlyq úzilis týraly bitim 24 qarasha kúni kúshine endi.
Eske salaıyq, palestınalyq HAMAS toby 7 qazan kúni Izraılge shabýyl jasap, mýzykalyq festıval ótip jatqan jerden kóptegen adamdy kúshtep áketken bolatyn. Tutqynǵa alynǵandar arasynda Qytaı men Taıland azamattary da bar ekeni aıtyldy.
Tutqyndardyń alǵashqy legi 24 qarashada bosatyla bastady. Olar Taılandtyń 12 azamaty ekeni aıtyldy.
Keıinnen HAMAS taǵy 13 ızraıldikti erkine qoıa berdi. Oǵan jaýap retinde Izraıl 39 palestınalyq tutqyndy jiberdi. Sonymen qatar Taılandtyń taǵy tórt azamaty bosatyldy.
Búgin HAMAS Qyzyl Krestke ızraıldik tutqyndardyń úshinshi tobyn tapsyrǵany málim etildi.
Jalpy, palestınalyq top qamaýǵa alynǵan 240-qa jýyq tutqynnyń 73-in bosatqany habarlandy.
