Gazadaǵy qurbandar sany 41,4 myńnan asty

ASTANA. KAZINFORM — Palestınanyń Gaza sektoryndaǵy Densaýlyq saqtaý mınıstrliginiń málimdemesine sáıkes, Izraıldiń blokadadaǵy Gaza sektoryna 2023 jyldyń 7 qazanynan beri jalǵasyp kele jatqan shabýyldary nátıjesinde qaza tapqan palestınalyqtardyń sany 41 455-ke jetken. Bul týraly Anadolu agenttigi habarlady.

Sońǵy 24 saǵattyń ishinde Izraıl armııasy Gazanyń ártúrli bólikterinde úsh ret jappaı «qyrǵyn» jasaǵan, eksklavtyń 24 turǵyny qaza tapqan. Sonymen qatar, taǵy 60 adam zardap shekti, delingen habarlamada.

Qaqtyǵys kezinde jaraqattanǵandardyń jalpy sany 95 878-ge jetti.

Qaza tapqandardyń máıitteri áli de qıraǵan ǵımarattardyń qırandylary men jol jıekterinde jatyr. Jedel járdem brıgadalary men azamattyq qorǵanys qyzmetkerleri Izraıl kúshteriniń kedergilerinen olarǵa jete almaı otyr, dep qosty Gaza sektoryndaǵy Densaýlyq saqtaý mınıstrligi.