Gazadaǵy densaýlyq saqtaý salasyn qalpyna keltirýge 7 mıllıard dollar qajet — DDU

ASTANA. KAZINFORM — Gaza sektoryndaǵy densaýlyq saqtaý júıesin qalpyna keltirýge ketetin shyǵyn kem degende 7 mlrd dollardy quraıdy, dep habarlaıdy TASS.

Bul týraly Dúnıejúzilik densaýlyq saqtaý uıymynyń (DDU) bas dırektory Tedros Gebreıesýs málimdedi. 

— Gazanyń densaýlyq saqtaý júıesin qalpyna keltirýdiń jalpy quny kem degende 7 mıllıard dollardy quraıdy, — dedi ol Jenevada ótken brıfıngte.

Dúnıejúzilik densaýlyq saqtaý uıymy buǵan deıin 41 naýqas pen olardyń janyndaǵy kómekshi 145 adamdy birneshe elge evakýatsııalaýǵa kómektesken.

— 15 000 naýqas, onyń ishinde 4 000 bala Gazadan tys jerde emdelýge muqtaj, — dep atap ótti uıym basshysy.

Ol sondaı-aq evakýatsııany kútip jatqan 700-den astam adamnyń qaza tapqanyn habarlady.

BUU, Eýropalyq Odaq jáne Dúnıejúzilik banktiń baǵalaýynsha, Gazany tolyq qalpyna keltirýge shamamen 70 mıllıard dollar qajet. Alaıda bul qarajatqa sektordyń barlyq aımaǵy qalpyna keltirilmeıdi.

Aıta keteıik, Gaza sektorynda bitim jarııalanǵannan keıin 87 palestınalyq qaza tapty.

Izraıl kepilge alynǵandardyń denesin HAMAS-qa tapsyrǵannan keıin Gaza sektoryna gýmanıtarlyq kómek kólemin arttyrýǵa ruqsat berdi.