Gazadaǵy beıbit turǵyndardyń ólimin toqtatýymyz kerek – Jozep Borrel
Eýropa odaǵynyń Syrtqy ister jáne qaýipsizdik saıasaty jónindegi joǵarǵy ókili Jozep Borrel óziniń Lıvan men Saýd Arabııasyna saparynyń qorytyndysy boıynsha málimdeme jasady, dep habarlaıdy Kazinform agettiginiń menshikti tilshisi.
«Úsh aı ótken soń Taıaý Shyǵysqa qaıta oraldym. Osy aralyqta qaıǵyly oqıǵa «Hamas» teraktilerinen bastalyp, keıin Gazany bombalaýmen jalǵasty. Sonyń saldarynan kóptegen beıbit turǵyn qurban boldy. Jaqynda Beırýtke, sodan keıin Er-Rııadqa saparladym. Bul rette, eki máselege qatysty oı túıdim. Birinshiden, Gaza turǵyndarynyń gýmanıtarlyq jaǵdaıy ýshyǵyp tur. Beınekonferentsııa ótkizip, BUU-nyń Taıaý Shyǵystaǵy Palestınalyq bosqyndarǵa kómektesý jónindegi agenttiktiń bas dırektory Fılıpp Lazarını men onyń Gazadaǵy qyzmetkerlerinen biraz aqparat aldym. Jaǵdaı óte qıyn, júzdegen myń adam baspanasynan aıyrylyp, azyq-túlik tapshylyǵy baıqalyp otyr. Ekinshiden, aımaqtaǵy shıelenis qaýpi joǵary, ıaǵnı Lıvan men Izraıl shekarasynda, sondaı-aq Qyzyl teńiz aımaǵynda jaǵdaı kúrdelene túsýi múmkin. Buǵan tosqaýyl qoıý mańyzdy. Biz soǵystyń órshýine jol bermeýimiz qajet. Soǵysty ýshyqtarmaı, toqtatý kerek. Qaqtyǵystyń ýshyǵa túsýine jol bermeýdiń jalǵyz sheshimi – Izraıl men Palestına arasyndaǵy shıelenistiń saıası sheshimin izdeý», – dedi Jozep Borrel.
Ol Saýd Arabııasynyń Syrtqy ister mınıstri Feısal bın Farhan ál-Saýdpen osy másele boıynsha kelissóz júrgizgenin aıtty. Sonymen qatar ol Izraıl men Palestına arasynda tıisti sheshimder oryndalýy kerek ekenin jáne saıası kelisim arqyly ǵana bul shıelenisti sheshýge bolatynyn sóz etti.
«Gaza sektorynda beıbit turǵyndardyń qany tógilip jatyr, osyny toqtatýymyz kerek. «Hamasty» joıý kerek. Biraq «Hamas» – bul ıdeıa, al ıdeıany birden joıa almaısyń. Atap aıtqanda, jaman ıdeıany joıýdyń jalǵyz joly – jaqsysyn usyný. Sondyqtan Palestına halqyna, onyń qadir-qasıetine, bostandyǵyna men qaýipsizdigine jańa múmkindikter berý kerek. Bul qadamdar Izraıldiń qaýipsizdigin qamtamasyz etýmen qatar iske asyrylýy tıis», - dedi EO Joǵarǵy ókili.
Degenmen J.Borrel buǵan qol jetkizý qıyn bolatynyn moıyndady.
«Men Brıýsselge osy baǵytta jumys isteýge jáne aımaqtaǵy qaqtyǵysty ýshyqtyrýǵa jol bermeýge mindetteme alyp oralamyn. Lıvanmen shekarada soǵys ashýǵa eshkim de múddeli emes, sondaı-aq Qyzyl teńizdegi kólik qozǵalysyna qozǵalysyna qaýip tóndirýi de eshqaısysyna kerek emes. Múmkin osyndaı shıelenis bireýdiń múddesine saı keletin shyǵar, biraq búkil adamzat qaqtyǵystyń ýshyǵýyn qalamaıtyny anyq», - dedi eýropalyq dıplomat.
