Gazadaǵy atysty toqtatý kelisiminiń ekinshi kezeńi bastaldy – HAMAS
ASTANA. KAZINFORM – Uıym ókiliniń aıtýynsha, seısenbi kúni halyqaralyq deldaldar arqyly kelesi kezeń boıynsha «baılanys pen kelissózder» bastalyp ketti.
HAMAS-tyń málimdeýinshe, Gaza sektorynda kepilge alynǵandardy bosatý jáne atysty toqtatý kelisiminiń ekinshi kezeńi boıynsha kelissózder bastalǵan.
- Kelissózderdiń ekinshi kezeńi bastaldy - delingen palestınalyq toptyń málimdemesinde.
Sondaı-aq onda Izraıldiń gýmanıtarlyq kómek kelisimin oryndaýdan «jaltaryp, keshiktirip» otyrǵany aıtyldy.
Izraıl aldaǵy kúnderi kelissózder júrgizý úshin Qatar astanasy Dohaǵa top jiberetinin málimdedi. Atysty toqtatý týraly alǵashqy kelisimge sáıkes ekinshi kezeń boıynsha kelissózder bitimniń 16-shy kúni bastalýy tıis edi.
Ekinshi kezeń soǵysty aıaqtaýǵa jáne aman qalǵan kepilge alynǵandardy bosatýǵa arnalǵan.
Ekinshi kezeń birinshige qaraǵanda kelisý qıynyraq bolady dep kútilip otyr. HAMAS buǵan deıin Izraıl Gaza sektorynan barlyq áskerin shyǵarmaıynsha, sońǵy kepilge alynǵandardy bosatpaıtynyn, sondaı-aq HAMAS-tyń áskerı jáne saıası múmkindikterin joımaıynsha mundaı qadamǵa barmaıtynyn málimdedi.
Netanıahý-Tramp kezdesýindegi kelisimniń bolashaǵy jáne Gaza taǵdyry
Búgin Aq úıde ótetin kezdesýde AQSh prezıdenti Donald Tramp pen Izraıl premer-mınıstri Bınıamın Netanıahý kelisimniń ekinshi kezeńine ótý máselesin talqylaıdy.
- Sopaqsha keńsedegi kezdesý barysynda taraptar Gaza sektory men Lıvandaǵy atysty toqtatý týraly qoldanystaǵy kelisimderdi saqtaý máselelerin, sondaı-aq Gazada qalǵan kepilge alynǵan barlyq 79 adamdy bosatý jónindegi ortaq mindettemeni talqylaıdy, - dedi Tramp ákimshiliginiń joǵary laýazymdy ókili brıfıngte.
Dúısenbi kúni Izraıl premer-mınıstri HAMAS-pen kepilge alynǵandar týraly kelisimniń kelesi kezeńin talqylaý úshin Vashıngtonǵa ushyp, onda AQSh-tyń arnaıy elshisi Stıven Ýıtkofpen jáne Ulttyq qaýipsizdik jónindegi keńesshi Maıkl Ýoltspen kezdesti.
The Times of Israel-diń ızraıldik joǵary laýazymdy sheneýnikke silteme jasap habarlaýynsha, Netanıahý Tramptan eger HAMAS atysty toqtatý kelisim sharttaryn buzsa nemese ekinshi kezeń sharttaryna qatysty kelissózderdi adal nıetpen júrgize almasa, AQSh Izraıldiń soǵysty qaıta bastaýyn qoldaıtyny týraly jarııa rastaýyn suraıdy.
Óz kezeginde Tramp ákimshiligi HAMAS-ty Gaza sektoryndaǵy bılikten ketirýdi kózdep otyr.
Seısenbi kúni AQSh-tyń ulttyq qaýipsizdik jónindegi keńesshisi Maıkl Ýolts pen memlekettik hatshy Marko Rýbıo HAMAS-tyń Gaza sektoryn basqara almaıtynyn ashyq málimdedi.
Túrkııaǵa, Aljırge jáne Qatarǵa deportatsııalaý
Seısenbi kúni HAMAS-tyń baspasóz hatshysy sondaı-aq Izraıl atysty toqtatý kelisimi aıasynda bosatqan 15 palestınalyq tutqynnyń bastapqyda Mysyrǵa deportatsııalanǵannan keıin Túrkııaǵa kelgenin málimdedi. HAMAS habarlaǵandaı, keıbir tutqyndar sonymen qatar Aljırge nemese Katarǵa da barýy múmkin.
Kelisim sharttaryna sáıkes, ızraıldikterdi óltirgeni úshin sottalǵan palestınalyqtar bosatylǵan jaǵdaıda Iordan ózeniniń Batys jaǵalaýy, Gaza sektory jáne Shyǵys Ierýsalımnen tys jerge birjola deportatsııalanatyn bolady.
Atysty toqtatýdyń birinshi kezeńinde HAMAS 13 kepilge alynǵan adam men taǵy bes Taıland azamatyn kelisimnen tys bosatqan. Buǵan jaýap retinde Izraıl 583 palestınalyq tutqyndy bosatyp, onyń 79-y Mysyrǵa jiberildi.
30 qańtarda Gaza sektorynda barymtadaǵy segiz adam – úsh Izraıl azamaty jáne bes Taıland azamaty bosatyldy.