Gazadaǵy 70 myń shatyrdy sý basty: Palestına BUU-dan shuǵyl kómek surady
ASTANA. KAZINFORM — Palestına ákimshiligi BUU Qaýipsizdik Keńesin Gaza sektoryndaǵy gýmanıtarlyq daǵdarysty toqtatý úshin shuǵyl sharalar qabyldaýǵa shaqyrdy. Buǵan óńirde jaýǵan nóser saldarynan qonys aýdarǵan turǵyndar turyp jatqan 70 myńǵa jýyq shatyrdy sý basýy sebep bolǵan. Bul týraly Anadolu agenttigi jazdy.
Palestına ákimshiligi taratqan jazbasha málimdemede BUU Qaýipsizdik Keńesine Izraıl tarapynan jasalyp jatqan zańbuzýshylyqtardy toqtatýǵa yqpal etý jóninde úndeý jasalǵan.
Sondaı-aq Izraılden gýmanıtarlyq kómektiń kedergisiz jetkizilýi úshin barlyq shekara ótkelderin ashý jáne palestınalyq turǵyndardy halyqaralyq deńgeıde qorǵaýdy qamtamasyz etý talap etildi.
Málimdemede qazirgi basty mindet — Gaza turǵyndarynyń ómirin saqtap qalý, olardy kúndelikti qajetti zattarmen qamtamasyz etý jáne gýmanıtarlyq apattyń odan ári ýshyǵýyna jol bermeý ekeni atap ótilgen.
Palestına tarapy Gaza sektoryndaǵy gýmanıtarlyq jaǵdaıdyń nasharlaýyna Izraıldiń áskerı áreketteri men qorshaýy, sondaı-aq gýmanıtarlyq kómektiń jetkizilýine qoıylǵan shekteýler sebep bolyp otyrǵanyn málimdedi.
Nóser saldarynan 70 myń shatyrdy sý basty
Gaza sektoryna jetken tómen qysymdy atmosferalyq aımaq qatty jaýyn-shashyn ákelgen. Sonyń saldarynan qonys aýdarǵan palestınalyqtar turyp jatqan 70 myńǵa jýyq shatyrdy sý basqan.
Palestına Syrtqy ister mınıstrligi de BUU-ny, halyqaralyq gýmanıtarlyq uıymdar men úkimettik emes uıymdardy jaǵdaıdy turaqtandyrý úshin shuǵyl ári úılesimdi sharalar qabyldaýǵa shaqyrdy.
Mınıstrlik málimdemesinde qys mezgiliniń bastalýymen balalar, qarttar men naýqastardyń ómirine tóngen qaýip kúsheıgeni aıtylǵan. Sonymen qatar sý burý jáne káriz júıeleriniń qıraýy turǵyndardyń jaǵdaıyn odan ári qıyndatyp otyrǵany kórsetilgen.
Osyǵan baılanysty Izraılge qysym jasap, Gazaǵa gýmanıtarlyq kómekti esh kedergisiz jetkizýge múmkindik berý qajettigi atap ótildi.
Palestına tarapy óńirge ýaqytsha turǵyn úı modýlderin, shatyrlardy, kórpelerdi, qysqy kıimder men jylytý quraldaryn jetkizýdi de talap etti. Budan bólek, azyq-túlik, aýyzsý, dári-dármek jáne medıtsınalyq materıaldar kólemin arttyrý qajettigi aıtyldy.
Myńdaǵan otbasy qysqy sýyqqa daıyn emes
Palestınany azat etý uıymynyń Bosqyndar isi jónindegi departamenti de halyqaralyq qaýymdastyqty Gaza sektoryndaǵy myńdaǵan qonys aýdarǵan otbasyǵa kómek kórsetýge shaqyrdy.
Buǵan deıin Gaza úkimetiniń baspasóz qyzmeti sońǵy 12 saǵat ishinde nóser jańbyr saldarynan 70 myń shatyrdy sý basqanyn habarlaǵan. Sondaı-aq ondaǵan ǵımarattyń qabyrǵasy qulap, anklavtyń birneshe aýdanynda adamdar jaraqat alǵan. Olardyń keıbiriniń jaǵdaıy aýyr dep baǵalanǵan.
Sonymen qatar Izraıldiń shabýyldary kezinde zaqymdanǵan, apatty jaǵdaıda turǵan ondaǵan ǵımarattyń qulaý qaýpi bar ekeni eskertildi.
Al Palestına azamattarynyń múddesin qorǵaıtyn Izraıldegi Birikken tizim partııasy eldiń buqaralyq aqparat quraldarynda Gaza sektoryndaǵy sý tasqynyna jetkilikti nazar aýdarylmaı otyrǵanyn synǵa aldy.
Partııa málimdemesinde palestınalyqtardyń Izraıldiń áskerı shabýyldary men gýmanıtarlyq kómekke qoıylǵan shekteýler saldarynan tórtinshi qysyn shatyrlarda qarsy alýǵa májbúr bolyp otyrǵany aıtylǵan.
Eske sala keteıik, buǵan deıin Gaza sektoryndaǵy 500 myń adam BUU kómeginen qaǵylǵan bolatyn.
