Gazadaǵy 76 qazaqstandyq elge qashan oralady – Izraıl SІM ókili jaýap berdi

Izraıl Syrtqy ister mınıstrligi Eýrazııa jáne Balqan máseleleri jónindegi bas dırektorynyń orynbasary Sımona Galperın Gazada qalǵan 76 qazaqstandyqtyń aman-esen oralýy Mysyr bıligi men HAMAS-tyń áreketine baılanysty ekenin aıtty, dep habarlaıdy Kazinform.

«Gazada qalǵan qazaqstandyqtar da sondaǵy birneshe myń sheteldik sııaqty jaǵdaıda. Biz Qazaqstan tarapynan da ózge túrli elder sııaqty sondaǵy azamattarynyń tizimin aldyq. Izraıl tarapy olardyń Gazadan shyǵýyna eshqandaı qarsylyǵymyz joq. Kerisinshe qoldaımyz, múmkin bolǵansha Gazadan shyǵýyna kúsh salamyz. Problema qaıda? Birinshiden, Mysyr arqyly shyǵý kerek edi. Mysyrlyqtar sheteldikterdiń Gazadan óz shekarasy arqyly shyǵýyna ótken aptada ǵana ruqsat bere bastady. Úsh apta boıy ondaıǵa ruqsat bergen joq. Qazir ruqsat bergenimen, kún saıyn shyǵatyn adam sanyn shektep otyr. Ár kún saıyn 500-600 adamnan aspaı tur. Gazada shamamen 7 myń sheteldik bolsa, kún saıyn 500 adam degende, báriniń shyǵýy úshin 2 aptadaı ýaqyt keteýi múmkin. Ol jaqta kezek qalaı qurylyp, qalaı shyǵarylyp jatqanyn bilmeımin. Biraq biz búkil tizimdi berdik», - dedi Izraıl SІM ókili Taıaý Shyǵystaǵy aýhal týraly brıfıngide.

Sondaı-aq ol HAMAS-tyń sheteldikterdi de tiri qalqan retinde ustap otyrǵanyn aıtty.

«Aldyńǵy kúni jáne keshe ne boldy? Bulkúnderi HAMAS tutqyndaǵylardyń shyǵýyna ruqsat bermedi. Ózderińiz bilesizder, ol jerde ızraıldikter ǵana emes, palestındikter de kepildikte otyr. Endi sondaǵy sheteldikterdi jibergisi kelmeı otyr. Sondyqtan Izraıl tarapynan shekteý nemese problema joq. Bizge áskerı operatsııa júrip jatqan Gazadan beıbit azamattar neǵurlym kóbirek shyǵyp, HAMAS qana qalǵany kerek», - dedi Sımona Galperın.

Syrtqy ister mınıstrliginiń málimeti boıynsha, Gaza sektorynda qazir Qazaqstannyń 76 azamaty bar. 

«Bizdiń derekterimiz boıynsha Gaza sektorynda Qazaqstan Respýblıkasynyń 76 azamaty bar. Otbasy múshelerimen qosa eseptegende olardyń sany – 161. Sonymen qatar sheteldik azamattardyń shyǵýyna baılanysty Mysyr jáne Izraıl tarapynan belgili talaptar bar. Olardyń úshten biri evakýatsııalaýǵa kelmeıdi. Olar kámeletke tolǵandar, erli-zaıyptylar», - dedi mınıstrliktiń resmı ókili Aıbek Smadııarov mınıstrlikte ótken baspasóz máslıhatynda.

Eske salsaq, Gaza sektoryndaǵy palestınalyq radıkaldar Izraıl aýmaǵyna zymyran atqylap, Izraıldiń ortalyǵy men ońtústiginde erekshe jaǵdaı engizilgen edi. 

Sońǵy málimetter boıynsha, Izraıl áskeri Gazany tolyǵymen qorshap, ekige bólip tastaǵan.