Gazada juqpaly aýrýlar asqynyp tur
ASTANA. KAZINFORM — Qarýly qaqtyǵys bastalǵaly Gaza sektorynda 65 myń adamnan qyshyma aýrýy anyqtalǵan. Bul týraly 24KZ habarlady.
Resmı derekke sensek, denesi bórtip, medıtsınalyq kómekke júgingen turǵyndardyń sany kún saıyn artyp barady. Taǵy bir mıllıonnan asa kisi respıratorlyq aýrýlarǵa shaldyqqan.
Sarapshylar bolsa: «Naýqastar sany áldeqaıda kóp bolýy múmkin», — deıdi.
Gaza sektorynda balalar arasynda teri aýrýlary tez tarap jatyr. Oǵan sebep jeterlik. Bosqyndarǵa arnalǵan ýaqytsha ortalyqtarda adam kóp bolǵasyn, sanıtarlyq talaptar saqtalmaıdy. Ásirese taza sý tapshylyǵynan adamdar jýyna almaı túrli indet tez taraıtyn bolǵan. Buǵan qosa kún ystyqtan shańǵa allergııasy bar adamdardyń aýrýy qozyp, jaǵdaıdy odan beter shıelenistirip jibergen. Qazir Gaza sektorynyń soltústiginde bir ǵana aýrýhana jumys istep tur. Ondaǵy qyzmetkerler naýqastardy qabyldap úlgermeı jatqanyn aıtady.
— Kúndelikti dermatologııa bólimine 300-500 adam túsip jatyr. Ary qaraı ózderińiz oılaı berińizder. Adam kóp. Jýynatyn sý joq. Sodan teri aýrýlary órship tur. Olar juqpaly ekenin umytpaý kerek. Ol azdaı, emdeıtin dári-dármek te tapshy. Munyń bári jaǵdaıdy qıyndatyp otyr, — deıdi dermatolog dáriger Nassım Basala.
Jaqynda jergilikti densaýlyq saqtaý mınıstrligi Gaza sektorynda polıomıelıt epıdemııasyn týraly jarııalady. Óıtkeni aǵyn sýlardan vırýs tabylǵan. Jergilikti dárigerler bul osy aımaq qana emes, jaqyn memleketterge de qaýipti bolýy múmkin ekenin eskertedi. Alaıda Dúnıejúzilik densaýlyq saqtaý uıymy ázirge birde-bir derek rastalmaǵanyn aıtady. Dese de qaýip joǵary ekenin jasyrmaıdy.
Sondyqtan Gazaǵa polıomıelıtke qarsy bir mıllıonnan asa vaktsına jiberdi.
— Bul — óte qaýipti jaǵdaı. Bizdiń densaýlyq saqtaý mınıstrligimiz ben Dúnıejúzilik densaýlyq saqtaý uıymy vaktsınalaý boıynsha birlese jumys istep jatyr. Biraq úlken bir qıyndyq bar. Ekpeni tońazytqyshta belgili bir temperatýrada saqtaý kerek. Al qaqtyǵystan elektr energııasy jıi óshetindikten, preparattar búlinýi múmkin, - deıdi pedıatr dáriger Ahmed Ál-Farra.
Bul azdaı, qazir Gazada A gepatıti tez tarap jatyr. Kúndelikti 800 jańa oqıǵa jaıly belgili bolady. Qarýly qaqtyǵysqa deıin 85 derek tirkelse, qazir kórsetkish 40 myńǵa jýyqtaǵan. Atys-shabys jaǵdaıynda olardyń jóndi em alýy múmkin emes. Sondyqtan Dúnıejúzilik densaýlyq saqtaý uıymynyń qoldaýymen qazir solardyń bir bóligi basqa elderde evakýatsııalanyp jatyr.
