Gazada jınalyp qalǵan qoqys saldarynan aýrý tarap jatyr

ASTANA. KAZINFORM – Gazada kópten beri jınalyp qalǵan aýqymdy qoqys saldarynan asqazan jáne teri aýrýlary tarady, dep habarlaıdy BELTA.

Gaza sektory qoqysqa toldy. Mundaǵy sanıtarlyq jaǵdaı qazir jergilikti turǵyndardyń densaýlyǵyna orasan zor zııanyn tıgizip otyr. Bul týraly BUU Damý baǵdarlamasynyń Gazadaǵy bólimshesiniń basshysy Alessandro Mrakıch málim etti.

-Gazada qaldyqtardyń kóptigimen baılanysty problema óte zor. Biz qazir barlyq sektor boıynsha 2 mln tonna ýtılızatsııalanbaǵan qaldyqtar týraly aıtyp otyrmyz,-dedi ol.

Mrakıch ekologııa, sý júıesi men turǵyndardyń densaýlyǵy úshin qaýip óte joǵary bolyp turǵanyn málimdedi.

Turǵyndardyń kóbi asqazan jáne teri aýrýlarynyń paıda bolýyna shaǵymdanyp otyr.

Sol jerde jumys istep jatqan dárigerler qalyptasqan jaǵdaıdy qorshaǵan ortanyń lastanýymen baılanystyryp otyr.

Olardyń sózinshe, teri aýrýlary qoqys úıindilerine jaqyn jerlerge tigilgen shatyrlardyń kóptigi saldarynan tarap jatyr.

BUU ókilderi máseleni sheshý joldaryn qarastyryp jatyr. Bul rette qaldyqtardan elektr qýatyn óndiretin zaýytttar salý máselesi de bar.

Alaıda jedel áreket etý úshin aımaqty tazalaýǵa múmkindik beretin aýyr tehnıka men qurylǵylar qajet.

Osyǵan deıin BUU-nyń Gaza sektorynda 1 mıllıon turǵynǵa gýmanıtarlyq kómek úlestirgeni týraly jazdyq.