Gazada jarylystan ǵımarat qulap, 21 ızraıldik áskerı qaza tapty
Gaza sektorynyń ońtústigindegi jarylystan ǵımarat qulap, 21 ızraıldik sarbaz qaza tapty. Bul týraly 23 qańtarda ótken baspasóz máslıhatynda Izraıl qorǵanys kúshteriniń baspasóz hatshysy Danıel Hagarı málimdedi, dep habarlaıdy Kazinform Sınhýaǵa silteme jasap.
Ǵımarattyń qulaýyna HAMAS-tyń ızraıldik tankke qarsy granatamedten oq atýy sebep bolǵan. Hagarı Izraıl áskerıleriniń aımaqtaǵy mindetiniń biri – HAMAS-qa tıesili ǵımarattardy joıý ekenin aıtty. Shabýylǵa ushyraǵan tank osy operatsııany júzege asyryp jatqan áskerı qyzmetkerlerdiń qaýipsizdigin qamtamasyz etken.
Hagarı qaıtys bolǵandardyń arasynda kóptegen rezervshiler bar ekenin aıtty.
Izraıl premer-mınıstri Bınıamın Netanıahý óz eliniń armııasy tolyq jeńiske jetkenshe HAMAS-qa qarsy kúresti jalǵastyratynyn aıtty. Netanıahý Gaza sektorynyń ońtústiginde 21 sarbazdyń ómirin qıǵan ǵımarattyń qıraýyn tergeýge ýáde berdi.
TsAXAL agenttiginiń habarlaýynsha, Gaza sektoryndaǵy qurlyq operatsııasy bastalǵaly qaza tapqan ızraıldik áskerılerdiń sany 219-ǵa jetken. 1200-den astam sarbaz jaralanǵan. DPA agenttiginiń habarlaýynsha, 2023 jyldyń 7 qazanynda HAMAS-tyń Izraılge jasaǵan aýqymdy shabýylynan keıin qaza tapqan ızraıldik sarbazdardyń jalpy sany 556-ǵa jetken.
