Gazada túrik qorynyń qoldaýymen orta mektep ashyldy
ASTANA. KAZINFORM — Izraıldiń shabýylynan sektorda 20 myńnan astam oqýshy men 1200-den astam bilim berý qyzmetkeri qaza taýyp, oqý oryndarynyń 92%-y qırady. Bul týraly Anadoly agenttigi jazdy.
Gaza sektorynda Adam quqyqtary men bostandyqtary (IHH) gýmanıtarlyq kómek qorynyń qoldaýymen salynǵan aǵash mektep ǵımaratynyń saltanatty ashylý rásimi ótti.
Sharaǵa Gaza sektorynyń orta jáne joǵary bilim mınıstriniń orynbasary Mahmýd Matar, Gaza meri ıAhıa as-Serradj, Gazadaǵy IHH ókili Eshref Djarrade, IHH jobasynyń dırektory Ala Abý Hashım, sondaı-aq resmı jáne jergilikti bılik ókilderi men ata-analar qatysty.
Mınıstrdiń orynbasary Mahmýd Matar jańa mektep qazirgi jaǵdaıda «úmit sáýlesi» bolǵanyn aıtty.
Ol Izraıl shabýyldarynyń saldarynan 20 myńnan astam stýdent pen 1200-den astam bilim berý qyzmetkeriniń qaza tapqanyn, mektepterdiń 92 paıyzy zardap shekkenin atap ótti. Sondaı-aq Gazada bilim júıesin qalpyna keltirý úshin kem degende 5 jyl qajet ekenin aıtty.
Gaza meri de Túrkııanyń qoldaýy úshin alǵys aıtyp, mekteptiń Gazanyń soltústigindegi qıraǵan aımaqtardaǵy bilimniń jandanýyna úles qosatynyn jetkizdi.
Joba dırektory Ábý Hashım bul mekteptiń Gazanyń soltústiginde tolyǵymen aǵashtan salynǵan alǵashqy mektep ekenin aıtty.
Abý Hashım bul jobanyń Palestına halqy aldyndaǵy gýmanıtarlyq jáne moraldyq jaýapkershilik aıasynda júzege asyrylǵanyn, bul Túrkııanyń qoldaýymen júzege asyrylatyn bilim berý jobalarynyń bastamasy ekenin atap ótti.
Segiz kabınetten turatyn mektep shamamen 1200 oqýshyǵa arnalǵan.
Aıta keteıik, Egıpet pen Gaza sektory arasyndaǵy Rafah ótkeli synaq rejıminde ashylady.