Gazada tek mylqaýlar ǵana qyzmet kórsetetin meıramhana ashyldy
ASTANA. 10 qańtar. QazAqparat - Gaza sektorynda tek mylqaýlar ǵana qyzmet kórsetetin «Atfaluna» meıramhanasy ashyldy. Atfaluna - arab sózi, qazaqshalaǵanda «Bizdiń balalarymyz» degen maǵynany beredi eken. Meıramhanany osy attas uıym kásipkerleri ashqan. Mundaǵy daıashylar da, aspazshylar da sóıleı almaıdy. Qonaqtar tapsyrys beretin kezde ym-ısharat tiliniń aýdarmashysy arqyly tildesedi. Tek meıramhana basshysy men esepshisi ǵana mylqaý emes. Telefon qońyraýlaryna jaýap berip, tapsyrys qabyldaıtyn solar.
muslim.kz málimetine qaraǵanda, kásipkerler bul jobany júzege asyrýda eki maqsatty kózdep otyr: birinshisi, múmkindigi shekteýli mylqaý jandarǵa qoǵam nazaryn aýdarý, ekinshisi, jumyssyzdyq deńgeıin azaıtýǵa úles qosý. Gaza sektoryndaǵy halyqtyń 45 paıyzy eki qolǵa bir kúrek taba almaı júrgenin aıta ketý kerek.
Ahmed Dahman ym-ısharat tilinde bylaı deıdi: «Bul jumys meniń bolashaqqa degen senimimdi nyǵaıta tústi. Buǵan deıin mańdaı terimmen aqsha tabý mıyma kirip te shyqpaıtyn. Meıramhanaǵa keletin adamdardyń da tarapynan únemi jyly qarym-qatynas pen qoldaý sezinemiz. Kóbisi ym-ısharat tilin úırenip alýǵa nıet bildirip júr».
Rasynda, bul meıramhananyń ashylýy osyndaı muqtaj jandar úshin taptyrmas múmkindikter ashyp otyr. Sebebi, Gaza sektorynda mylqaýlardyń kóbisi arnaıy bilim de ala almaıdy eken.
