Gazada mıllıonǵa jýyq áıel men qyz ashtyqqa tap boldy – BAPOR

ASTANA. KAZINFORM – Gazada mıllıonǵa jýyq áıel men qyz ashtyq pen zorlyq-zombylyqqa tap bolyp otyr. Bul týraly Palestınalyq bosqyndarǵa kómek kórsetý jáne jumystardy uıymdastyrý jónindegi BUU-nyń Blıjnevostok agenttigi (BAPOR) málimdedi, dep habarlaıdy Sınhýa.

Agenttiktiń dereginshe, ashtyq óńirde jyldam taralýda.

— Áıelder men qyzdar barǵan saıyn qaýipti joldarmen aman qalýǵa jantalasyp jatyr. Olar azyq-túlik pen sý izdeýge shyǵyp, ómirine úlken qater tóndiredi, — delingen habarlamada.

Uıym Izraıldiń Gazany qorshaýyn alyp shyǵyp, 2 mıllıonnan astam halqy bar aımaqqa gýmanıtarlyq kómekti «qajetti kólemde» jetkizýdi talap etti.

Sondaı-aq, málimdeme qarsańynda Gaza densaýlyq saqtaý vedomstvolary sońǵy táýlikte ashtyq pen qatty álsireýden 11 adamnyń qaıtys bolǵanyn habarlady. Qurbandar arasynda bir bala bar. Jalpy ashtyqtan kóz jumǵandar sany 251-ge jetti, olardyń ishinde 108 bala bar.

Buǵan deıin 2023 jylǵy 7 qazannan beri Izraıl shabýyldary saldarynan Gazada 61 897 adamnyń qaza tapqany málim bolǵan edi.