Gazada qurylatyn halyqaralyq kúshke qaı elderden áskerıler tartylady
ASTANA. KAZINFORM — Gaza sektorynyń bolashaǵyna qatysty bes memleketpen halyqaralyq keńes júrgizilip jatyr, — dep habarlaıdy Kzinform agenttigi.
Vashıngtonda Donald Tramptyń josparyn iske asyrý aıasynda Gaza sektorynyń qaýipsizdigin qamtamasyz etý úshin halyqaralyq kúshterdiń qurylýyna daıyndyq bastaldy. Bul týraly beısenbi kúni Reuters agenttigi AQSh prezıdentiniń eki aǵa keńesshisine silteme jasap málimdedi.
Basylym derekkóziniń aıtýynsha, 20 tarmaqtan turatyn «Tramptyń Gazaǵa qatysty josparynyń» negizgi sharty — AQSh-tyń qoldaýymen halyqaralyq turaqtylyq ornatý kúshin qurý.
Vashıngton mıssııany úılestirý men qoldaý úshin 200 áskerı qyzmetshini jibere alatynyn málimdedi. Alaıda olar anklavtaǵy is-áreketterge tikeleı qatyspaýy tıis.
— Qazir bizdiń maqsat — jalpy jaǵdaıdy turaqtandyrý. Halyqaralyq turaqtylyq ornatý kúshin qurý qazirdiń ózinde qolǵa alynǵan, — dedi keńesshilerdiń biri.
Olardyń aıtýynsha, qazirde birqatar memleketpen kelissóz júrgizilip jatyr. Onyń ishinde Indonezııa, BAÁ, Mysyr, Qatar jáne Ázerbaıjan sekildi elder bar.
Politico basylymynyń málimeti súıensek, Indonezııa, Ázerbaıjan jáne Pákistan elderi Gaza sektorynyń qaýipsizdigin qamtamasyz etý mıssııasyna negizgi úmitkerler retinde qarastyrylyp otyr.
Buǵan deıin eshbir memleket áli resmı túrde áskerı kontıngent jiberýge nıetti ekenin habarlaǵan joq. Tek Indonezııa BUU bitimgerlik mıssııasy quramynda 20 myń áskerı qyzmetshi jiberýge daıyn ekenin aıtqan.
Keńesshilerdiń aıtýynsha, aımaqta qazir shamamen 20 amerıkalyq áskerı qyzmetshi bar, olar úılestirý jáne baqylaý fýnktsııalaryn atqaryp otyr.
— Biz óńirdi turaqtandyrý isine aımaqtaǵy ár resýrs pen árbir seriktesimizdi barynsha jumyldyrǵymyz keledi, — dedi keńesshi.
Ol sonymen birge anklav turǵyndarynyń eshqaısysy kúshtep kóshirilmeıtinin, qaıta qurý jumystaryn HAMAS-tyń qarýly kúshteri joq aýdandarda júzege asyrý josparlanǵanyn aıtty.
AQSh prezıdenti Tramp Gaza sektoryn tolyq qalpyna keltirý josparyn jarııalaǵan, biraq bul protseske biraz ýaqyt kerek.
Sonymen qatar, ızraıldik tutqyndardyń máıitin shyǵarý jumysy qırandylar men jarylmaǵan oq-dárilerdiń kesirinen sozylyp ketýi yqtımal.
Aıta keteıik, Izraıldiń qorǵanys mınıstri Gazada atys qaıta jalǵasýy múmkin ekenin málimdedi.
Sondaı-aq buǵan deıin Izraıl Gaza sektoryna 45 palestınalyqtyń máıitin tapsyrǵanyn habarlaǵan edik.
Kamıla Múlik