Gazada qol-aıaǵy joq naýqastar kóbeıdi - dárigerler basqasha emdeý jolyn tappaı jatyr
Gaza sektorynda Izraıl men HAMAS arasyndaǵy soǵys jaǵdaıynda dárigerler konservatıvti emniń ornyna ampýtatsııany kóbirek tańdap jatyr, sebebi aýrýhanalardyń tıisti em kórsetý úshin qarajaty joq. Kazinform agenttigi bul týraly Euronews-ke silteme jasap habarlaıdy.
Ampýtatsııa - adam ómirin saqtap qalý tásili, sonymen birge adam múshesin saqtap qalý úshin tıisti em kórsete almaý sımvoly.
DDU málimetinshe, Izraıl men HAMAS arasyndaǵy áskerı qaqtyǵystyń osy kezeńinde ampýtatsııa jaraqat alǵan 50 myńnan astam palestınalyqtyń kóbine jasaldy.
Deır-el-Balah qalasyndaǵy aýrýhanada saýyǵyp ketýdiń ártúrli kezeńderinde ondaǵan adam jatyr.
Shaıma Nabahın Izraıldiń áýeden jasaǵan shabýyly kezinde bir aıaǵynan aıyryldy.
«Men úshin bári ózgerdi. Men ómirimniń barlyq salasyn basqara alatyn saý adam bolýdan muqtaj janǵa aınaldym», - dedi ol.
Onyń qasyndaǵy tósekte jatqan Naval Djaber qos aıaǵynan aıyryldy.
«Jaraqat ómirimdi ózgertti, ony urlady, meni sal etti. Men júrýdi, eń bolmaǵanda turýdy armandaımyn, biraq jasaı almaımyn. Balalaryma kómekteskim keledi, biraq ol da qolymnan kelmeıdi», - dedi ol kózine jas alyp.
Medıtsına sarapshylarynyń pikirinshe, kóptegen naýqastardy ampýtatsııa jasamaı, konservatıvti emdeýge bolady, biraq anklavta ol úshin esh jaǵdaı joq. Soǵys saldarynan keıbir aýrýhanalar jabyldy, basqalary tolyp, dári-dármek pen qyzmetkerlerdiń tapshylyǵyn sezilýde.
