Ǵazada qıraǵan ǵımarat astynan eki áýlettiń 99 múshesiniń máıiti shyǵaryldy
ASTANA. KAZINFORM – Gaza sektorynyń ońtústigindegi Sabra aýdanynda ornalasqan Abý Sherııa men ál-Hasaııne áýletterine tıesili qıraǵan ǵımarattyń úıindisinen osy eki otbasynyń 99 múshesiniń máıiti shyǵaryldy, dep habarlaıdy palestınalyq WAFA agenttigi.
Aqparat agenttiginiń málimetinshe, izdestirý-qutqarý toptary qalanyń ońtústigindegi Sabra aýdanynda Izraıl soqqysynan qıraǵan ǵımarattyń úıindisin arshý jumystaryn júrgizdi.
2023 jylǵy qazannan 2025 jylǵy 7 maýsymǵa deıin Izraıl avıatsııasynyń soqqylaryna ushyraǵan bul ǵımaratta ondaǵan adam qaza tapqan. Qaza tapqandardyń basym bóliginiń máıitteri úıindi astynda qalyp qoıǵan.
Іzdestirý-qutqarý toptary tehnıkalyq qıyndyqtar men operatsııanyń kúrdeliligin atap ótip, Izraıldiń Gaza sektoryna jasaǵan shabýyldary saldarynan qıraǵan ǵımarattardyń úıindileriniń astynda áli de myńdaǵan adamnyń máıiti jatqanyn málimdedi.
Gazadaǵy úıindi máselesi
Izraıldiń shabýyldary saldarynan Gazada 50–68 mıllıon tonnaǵa deıin úıindi paıda boldy. Sol úıindilerdiń astynda áli kúnge deıin shyǵarylýyn kútip jatqan shamamen 8 500 adamnyń máıiti bar.
Ótken jyly qazanda jasalǵan atysty toqtatý týraly kelisimniń alǵashqy kezeńinde óńirge aýyr tehnıkany kirgizý qarastyrylǵanyna qaramastan, Izraıl shekara ótkelderin jabyq ustap, qalaǵa gýmanıtarlyq kómektiń jetkizilýine múmkindik bermeı otyr.
Qazirgi jaǵdaıda óńirdegi jalǵyz aýyr tehnıkamen izdestirý jumystaryn júrgizip jatqan azamattyq qorǵanys bólimsheleri halyqaralyq qaýymdastyq qajetti tehnıkalyq qoldaý kórsetken jaǵdaıda ǵana birneshe jylǵa sozylýy múmkin bul jumysty shamamen úsh aıdyń ishinde aıaqtaı alatynyn málimdedi.
Aıta keteıik, buǵan deıin Izraıldiń Gaza sektoryna jasaǵan kezekti soqqylarynan 7 palestınalyqtyń qaza tapqany belgili boldy.
