Gazada Izraıldiń áýe shabýyldary saldarynan 11 adam mert boldy
ASTANA. KAZINFORM — Izraıldiń Gaza sektoryna jasaǵan áýe shabýyldary saldarynan 11 palestınalyq kóz jumdy, dep habarlaıdy Reuters.
Izraıl armııasy bul soqqynyń HAMAS-tyń atysty toqtatý kelisimin buzýyna jaýap retinde jasalǵanyn aıtty.
Gazadaǵy medıtsınalyq qyzmetkerlerdiń aıtýynsha, bir áýe shabýyly shatyrly lagerge jasalyp, keminde tórt adam qaza tapty. Han ıÝnıs mańyndaǵy soqqydan 5 adam, Gaza sektorynyń soltústiginde taǵy bir adam qaza tapty.
HAMAS-tyń Gaza sektoryndaǵy ókili Hazem Kasem Izraıldi qonys aýdarǵan palestınalyqtarǵa qarsy jańa shabýyl jasady dep aıyptap, muny kelisimderdi óreskel buzý dep atady. Onyń aıtýynsha, oqıǵa AQSh prezıdenti Donald Tramp janyndaǵy Beıbitshilik keńesiniń birinshi otyrysyna birneshe kún qalǵanda bolǵan.
Izraıl armııasy bul soqqylardy halyqaralyq quqyqqa saı jáne dál dep atap, Palestına qazan aıynda qol jetkizilgen atysty toqtatý kelisimin birneshe ret buzǵanyn basa aıtty.
Eske sala keteıik, 2025 jyldyń 6 qazanynda Izraıl men HAMAS delegatsııalary Egıpet, Katar, AQSh jáne Túrkııa medıatorlarynyń qatysýymen janjaldy retteý boıynsha janama kelissózderdi qaıta bastady. 9 qazanda taraptar AQSh prezıdenti Donald Tramp usynǵan beıbitshilik josparynyń birinshi kezeńin júzege asyrý týraly kelisimge qol qoıdy. Atysty toqtatý týraly kelisim byltyr 10 qazanda kúshine endi.
Buǵan deıin Tramp óziniń Truth Social áleýmettik jelisinde HAMAS «adamdardy óltirýdi» jalǵastyra berse, «uıymdy joıamyz» dep qorqytty.