Gazada Izraıl soqqysynan HAMAS komandıri qaza tapty
ASTANA. KAZINFORM - HAMAS Gaza sektorynda Izraıl soqqysynan Izz ad-Dın ál-Haddad tobynyń komandıri qaza tapqanyn rastady. Izraıl ony 2023 jyldyń 7 qazanynda shabýyldardy uıymdastyrýshylardyń biri dep ataıdy jáne onyń ızraıldikterdi óltirý men urlaýǵa qatysy bar ekenin málimdedi, dep habarlaıdy BBC.
Izraıl premer-mınıstri Bınıamın Netanıahý men Qorǵanys mınıstri Izrael Kats shabýyl týraly birlesken málimdeme jasap, ál-Haddadtyń «myńdaǵan ızraıldik beıbit turǵyn men TsAHAL sarbazdarynyń ólimine, urlanýyna jáne jaralanýyna kináli» ekenin málimdedi.
Shabýyl týraly ne belgili
Kýágerlerdiń aıtýynsha, shabýyl Gaza qalasynyń ortalyǵyndaǵy turǵyn úı keshenine baǵyttalyp, úlken órtke sebep bolǵan. Keıinirek aımaqtan qashyp bara jatqan kólikke ekinshi shabýyl jasaldy. Gazadaǵy derekkóz málimetinshe, shabýyldan taǵy úsh adam qaza tapqan. Ál-Haddad kólikte bolǵan bolýy múmkin degen boljam bar.
Izraıl bıligi operatsııa 7 qazandaǵy shabýyldyń negizgi qatysýshylarynyń birine baǵyttalǵanyn málimdedi. HAMAS buǵan deıin Izraıldi atysty toqtatý týraly kelisimdi buzdy dep aıyptaǵan bolatyn.
Aıta keteıik, AQSh-tyń araǵaıyndyǵymen Izraıl men Lıvan 16 sáýirden beri kúshinde bolǵan atysty toqtatý rejımin uzartýǵa kelisti.
