Gazada azyq-túlik bite bastady, mıllıondaǵan adam ashtyqtyń aldynda tur
ASTANA. KAZINFORM – BUU Búkilálemdik azyq-túlik baǵdarlamasy (BAB) Rafah qalasynyń qoımalaryndaǵy azyq-túliktiń túgesilýine baılanysty Gaza sektorynyń ońtústiginde jaǵdaı qıyndaýy múmkin ekenin aıtýda.
Bul týraly BAB atqarýshy dırektory Karl Skaý málim etti, dep jazady BBC.
«Biz Rafahtaǵy operatsııaǵa deıin azyq-túlik qoryn jınap alǵan edik. Alaıda ol qor taýsylyp jatyr jáne bizde qazir burynǵydaı múmkindik joq»,- dedi uıym ókili.
Bul rette ol bosqyndar sanynyń qobeıýi jaǵdaıdy odan saıyn qıyndatqanyn, 1 mln adamnyń tar keńistikte turyp jatqanyn jetkizdi.
Skaýdyń sózinshe, Gazanyń ońtústiginde sý men káriz júıesine baılanysty jaǵdaı múldem qıyndap ketti.
Skaý sonymen qatar gýmanıtarlyq júk alyp bara jatqan BAB kólikteri Gazanyń shekara beketterinde kezek kútip turyp qalǵanyn aıtty.
«Biz baqylaý-ótkizý beketterinde kúnine 5-ten 8 saǵatqa deıin turdyq. Bul áskerı operatsııa ótip jatqan aýdan jáne saparymyz qaýipsiz bolý úshin arnaıy ruqsat kerek»,-dedi.
BUU málimetteri boıynsha shildeniń ortasyna taman Gazadaǵy mıllıonnan astam adam ashtyqqa ushyraýy múmkin.
Kelissózder tyǵyryqqa tireldi.
Izraıl men HAMAS arasyndaǵy kelissózder de sheshimin taba almady. Vashıngton bolsa aldaǵy ýaqytta kelissózderden nátıje joq ekenin aıtady. Sebebi AQSh tarapynan jasalǵan jahandyq deńgeıdegi usynysty taraptardyń eshqaısysy da tolyq qoldamaǵan.
Soǵan qaramastan Italııada ótip, qazirgi tańda álemdik janjaldarǵa qatysty máseleler talqylanǵan G7 samıtinde sóılegen sózinde AQSh prezıdenti Djo Baıden jaǵdaıdyń retteletininen áli de bolsa úmitti ekenin aıtqan.
Izraıl Gaza sektoryn bombalap jatqan tusta HAMAS atysty toqtatyp, Izraıl áskerin palestına anklavynan áketý jónindegi AQSh-tyń usynysyna ózgeris engizýdi usyndy.
HAMAS AQSh-tyń usynystaryn Izraıldiń oryndaıtynynan kúmámdanady.
Ótken jyldyń qazan aıynda palestınalyqtardyń evreı memleketine shabýylynan keıin bastalǵan Izraıldiń HAMAS-qa qarsy soǵysy saldarynan Gaza sektorynyń málimetterinshe, 37 myńnan astam adam qaza tapqan.
