Gazada áýeden tastalǵan kómek 14 jastaǵy balanyń ómirin jalmady

ASTANA. KAZINFORM — Gazada áýeden tastalǵan gýmanıtarlyq júk jáshiginiń qulaýynan 14 jastaǵy jasóspirim qaza tapty, dep habarlaıdy Anadoly.

Gazanyń ortalyq bóliginde, Nýsaırat bosqyndar lageriniń mańynda gýmanıtarlyq kómekti áýeden tastaý operatsııasy kezinde jáshiktiń qulaýynan 14 jastaǵy Muhammed Id esimdi jasóspirim qaza tapty, taǵy birneshe adam jaraqat aldy.

Densaýlyq saqtaý salasyndaǵy derekkózderdiń habarlaýynsha, gýmanıtarlyq kómek salynǵan jáshik bosqyndar lageriniń mańyna qulap, aýyr jaraqat alǵan Muhammed Id El-Avde aýrýhanasyna jetkizilgenimen, sol jerde kóz jumǵan.

Oqıǵa saldarynan birneshe palestınalyq jaraqat aldy, olardyń keıbiriniń jaǵdaıy aýyr dep baǵalanyp otyr.

Bul jaǵdaı — 16 shildeden beri gýmanıtarlyq kómekti áýeden jetkizý kezinde bolǵan tórtinshi qaıǵyly oqıǵa.

Izraıldiń Gaza sektoryna jasap otyrǵan blokadasy saldarynan týyndaǵan gýmanıtarlyq daǵdarys jaǵdaıynda keıbir memleketter kómek jetkizýdiń osy tásiline júginip keledi.

Buǵan deıin Halyqaralyq qaýymdastyq Izraıldi Gaza sektoryn basyp alýdy dereý toqtatýǵa shaqyrǵanyn jazǵan edik.