Gazada atysty toqtatý kelisiminen keıin 100-den astam bala qaza tapty – ıÝNISEF

ASTANA.KAZINFORM - 2025 jyldyń 19 qazanynda atysty toqtatý týraly kelisim kúshine engennen bergi úsh aı ishinde Gaza sektorynda 100-den astam bala qaza taýyp, taǵy kóptegen bala jaraqat aldy, dep habarlaıdy Anadolu Ajansı.

Bul týraly Jenevadaǵy BUU keńsesi ótkizgen baspasóz máslıhatynda Birikken Ulttar Uıymy Balalar qorynyń (ıÝNISEF) ókili Djeıms Elder habarlady.

Basylymnyń jazýynsha, Elder gazalyqtar qaqaǵan qysta qıyn jaǵdaıdy bastan ótkerip jatqanyn jetkizdi. Sonymen qatar aıtýynsha, ıÝNISEF kómek kórsetýdi jalǵastyryp jatyr.

Ol sońǵy birneshe kúnde balalar taǵy da sýyqtan qaıtys bolǵanyn aıtty, bıylǵy qysta gıpotermııadan qaıtys bolǵan balalardyń jalpy sany altyǵa jetken.

ıÝNISEF ókili atysty toqtatý densaýlyq saqtaý, tamaqtaný, sý jáne sanıtarııa salalaryn qosa alǵanda, gýmanıtarlyq jaǵynan oń ózgeriske múmkindik bergenin moıyndady. Biraq balalardyń jaǵdaıy áli de aýyr ekenin atap ótti.

– Elder balalardyń «shynaıy qaýipsizdigin» qamtamasyz etý úshin atysty tolyq toqtatýǵa, gýmanıtarlyq kómekke kedergisiz qol jetkizýge jáne medıtsınalyq evakýatsııaǵa shaqyrdy, - delingen málimdemede.

Aıta keteıik, Izraıl armııasy Gaza sektorynyń okkýpatsııalanǵan aýdandaryna áýe jáne artıllerııalyq soqqy jasady. Atap aıtqanda, Gaza jáne Rafah qalalaryn atqylady.

Qazir Izraıl áskeri sektor aýmaǵynyń 50 paıyzdan astamyn basyp alǵan.