Gazada ashtyqtan qaza tapqandar sany 175 adamǵa jetti
ASTANA. KAZINFORM — Izraıl qorshaýyndaǵy Gaza sektorynda sońǵy 24 saǵat ishinde ashtyqtan taǵy alty palestınalyq kóz jumdy. Saldarynan ashtyqtan qaza tapqandardyń jalpy sany 175 adamǵa jetti, dep habarlaıdy Anadoly.
Bul týraly Gazadaǵy Densaýlyq saqtaý mınıstrliginiń bas dırektory Mýnır ál-Býrsh málimdedi.
Áleýmettik jelide jarııalanǵan málimdemesinde ál-Býrsh ashtyqtan kóz jumǵandardyń qatarynda 93 balanyń bar ekenin naqtylady.
Gaza ashtyqtan «ólip jatyr»
Izraıldiń soqqysyna ushyraǵan jáne gýmanıtarlyq kómektiń enýine kedergi keltiretin qatań blokada jaǵdaıyndaǵy Gaza sektorynda gýmanıtarlyq apat qalyptasty — azyq-túlik, aýyz sý, dári-dármek, medıtsınalyq jáne gıgıenalyq quraldar jetispeıdi.
Ashtyqtan kóz jumǵandar sany, ásirese balalar arasynda, jyldam ósip keledi.
Jergilikti jáne halyqaralyq derekkózder Izraıldiń ashtyq pen shóldi «qarý retinde» qoldanyp otyrǵanyn atap kórsetýde.
Izraıl armııasy anklavtyń azamattyq ınfraqurylymynyń 88 paıyzyn qıratqan jáne buryn kúshpen qonys aýdarýǵa májbúr bolǵan palestınalyqtar ýaqytsha bas saýǵalaǵan aýdandarǵa shabýyldaryn jalǵastyryp jatyr.
Sektorda turatyn 2,3 mıllıonǵa jýyq adamnyń shamamen 2 mıllıony Izraıl shabýyldary men evakýatsııa týraly buıryqtar saldarynan el ishinde qonys aýdarǵan. Kópshiligi birneshe márte qonys aýdarýǵa májbúr bolǵan.
Ómir súrýdiń eń qarapaıym jaǵdaılarynan aıyrylǵan palestınalyqtar sanıtarlyq talaptary saqtalmaǵan, dárethanasy joq, juqpaly aýrýlar tez taralatyn mektep ǵımarattarynda nemese qoldan jasalǵan shatyrlarda ómir súrip jatyr.
Osy arada Izraıl armııasy qonys aýdarǵan turǵyndar panalaǵan shatyrly lagerler men ózge de azamattyq nysandarǵa shabýyldaryn jalǵastyryp jatyr.
2023 jyldyń 7 qazanynan beri Izraıldiń Gaza sektoryna jasaǵan shabýyldary saldarynan keminde 60 430 palestınalyq qaza taýyp, taǵy 148 722 adam jaraqat alǵan.
Buǵan deıin BUU sońǵy eki kúnde Izraıl uıymdastyrǵan «áskerı» gýmanıtarlyq kómek taratý pýnktterinde azyq-túlik almaq bolǵan 100-den astam adamnyń qaza taýyp, júzdegen adamnyń jaralanǵanyn habarlaǵan edi.
Aıta ketelik Gaza sektorynda ashtyqtan kóz jumǵandar sany 169-ǵa jetkeni týraly habarlaǵan edik.