Gazada 65 000-nan astam bala ashtyq saldarynan emdelip jatyr
ASTANA. KAZINFORM – Gaza úkimetiniń habarlaýynsha, blokadadaǵy Gaza sektoryndaǵy 65 000-nan astam bala Izraıldiń úzdiksiz shabýyldary men qorshaýlaryna baılanysty tamaqtanbaý saldarynan paıda bolǵan syrqattaryna em alýǵa májbúr, dep jazdy Anadoly.
Gaza úkimetiniń baspasóz qyzmeti taratqan málimdemede Izraıldiń soqqylary men qatań qorshaýynyń aımaqtaǵy balalar aldynda turǵan gýmanıtarlyq apatty aıtarlyqtaı nasharlatqany atap kórsetildi.
— Izraıl ashtyq pen shóldi qarapaıym halyqqa qarsy júıeli qarý retinde qoldanady — bul halyqaralyq gýmanıtarlyq quqyqty tikeleı buzý, — delingen mátinde.
Qatań qorshaý jáne baqylaý-ótkizý pýnktteriniń jabylýy Gazadaǵy sanıtarlyq jáne medıtsınalyq jaǵdaıdy apatty deńgeıge jetkizdi, dep atap ótti Gaza úkimetiniń baspasóz qyzmeti.
Bılik ókilderiniń aıtýynsha, jaǵdaı ásirese osal toptar – balalar men sábıler arasynda alańdaýshylyq týdyryp otyr. Sońǵy aptalarda joqshlyqqa baılanysty tamaqtanbaý jaǵdaılary kúrt ósken.
Málimdemede 65 000-nan astam bala aýrýhanaǵa jatqyzylǵany aıtylǵan.
Sonymen birge Gaza sektoryndaǵy shamamen 1,1 mıllıon bala kún saıyn ashtyqpen betpe-bet keledi.
Málimdemede sondaı-aq azyq-túlik, dári-dármek jáne sý tapshylyǵy saldarynan júzdegen myń balalar, áıelder men qarttardyń ómirine qaýip tóndiretin gýmanıtarlyq apatqa Izraıldiń jaýapty ekeni basa aıtyldy.
Buǵan qosa, Palestına bıligi halyqaralyq qaýymdastyq pen tıisti uıymdardy áreketsiz dep aıyptap, olardyń únsizdigi men Izraıl basshylaryn jaýapqa tartpaýy zań buzýshylyqtardyń jalǵasýyna yqpal etip, beıbit turǵyndardyń azap shegýin kúsheıtetinin aıtty.
Málimdeme arqyly Izraıl sheneýnikteriniń halyqaralyq sottarda soǵys qylmystary úshin jaýap berýi talap etti. Izraıldiń Palestına aýmaqtaryn basyp alýynyń halyqaralyq quqyqty buzý ekenin rastaǵan Halyqaralyq sot sheshimine de qoldaý bildirildi.
Gaza úkimeti barlyq shekaralyq ótkelderdi dereý ashý, sondaı-aq gýmanıtarlyq kómektiń, dári-dármek pen azyq-túliktiń, ásirese balalar men aýyr naýqastardyń kedergisiz kirýin talap etti.
Eske sala keteıik, buǵan deıin Gaza sektoryndaǵy gýmanıtarlyq kómek taýsylyp, ashtyq kúsheıip bara jatqanyn jazǵan edik.