Gazada 60 myńdaı balanyń durys tamaqtana almaýyna baılanysty densaýlyǵy máz emes
ASTANA. KAZINFORM – Gaza sektoryna azyq-túlik pen dári-dármektiń kirýine tosqaýyl qoılǵandyqtan tamaqqa muqtaj jandardyń densaýlyǵy zııan shegip jatyr. Bulaı jalǵasa beretin bolsa, jaǵdaı kúrdelene túsedi, dep jazdy Anadoly eksklavtyń Densaýlyq saqtaý mınıstrligine silteme jasap.
Gazadaǵy 60 000-ǵa jýyq bala durys tamaqtanýǵa múmkindikteri joq bolýy sebepti densaýlyǵyna qatysty kúrdeli máseleler týyndap otyr. Bul týraly Izraıl 2 naýryzdan beri gýmanıtarlyq kómektiń kirýine tosqaýyl qoıyp otyrǵan eksklavtaǵy jaǵdaı týraly habarlaǵan Gaza sektoryndaǵy Palestına densaýlyq saqtaý mınıstrliginiń málimdemesinde aıtylǵan.
Azyq-túlik pen dári-dármektiń eksklavqa ákelinýine tosqaýyl qoıý jetkiliksiz tamaqtanýdan zardap shegetin adamdar sanynyń artýyna ákelýi múmkin, dep eskertti Densaýlyq saqtaý mınıstrligi.
— Epıdemııalyq aýrýlarǵa qarsy mańyzdy vaktsınalardy, ásirese balalarǵa arnalǵan polıomıelıtke qarsy vaktsınany jetkizýde kedergi bar. Buǵan qosa sapaly tamaq pen aýyz sý tapshy. Bul densaýlyǵy syr berip otyrǵan balalardyń jaǵdaıyn odan beter qıyndatyp otyr, — dep jazady basylym.
Buǵan deıin BUU-nyń Taıaý Shyǵystaǵy Palestınalyq bosqyndarǵa kómek kórsetý jáne jumys jónindegi agenttigi (UNRWA) gýmanıtarlyq kómektiń kirýine bes apta boıy shekteý qoıǵan Izraıldiń qatań blokadasy balalarǵa qatty áser etkenin habarlady.
Gaza sektoryndaǵy gýmanıtarlyq daǵdarys kún saıyn ýshyǵa tústi
Izraıl Hamaspen 42 kúnge sozylǵan atysty toqtatý jáne tutqyn almasý kelisiminiń birinshi kezeńi aıaqtalǵannan keıin 2 naýryzda Gaza sektoryna gýmanıtarlyq kómek ákelýdi toqtatý týraly sheshim qabyldady.
2,3 mıllıon halqy bar Gaza sektoryndaǵy 2 mıllıondaı adam Izraıldiń 2023 jyldyń 7 qazanynda bastalǵan áskerı shabýyldary saldarynan úılerin tastap ketýge májbúr boldy.
Izraıldiń soqqylary azamattyq ınfraqurylymdar men aýrýhanalardy qıratyp, Gaza sektory gýmanıtarlyq apatqa ushyrady. Óńirde sý men jaryq óshirilýi, shekaralyq ótkelderdiń jabylýy eksklav turǵyndarynyń aýyr turmysyn odan ári nasharlatyp otyr.
18 naýryz kúni tańerteń Izraıl armııasy 19 qańtarda Gaza sektorynda kúshine engen atysty toqtatý kelisimin buzyp, jappaı shabýyldaryn qaıta bastady.
Izraıl armııasy qaıta shabýyldaǵaly 1449 palestınalyq qaza tapty, olardyń kópshiligi qarttar, áıelder men balalar, taǵy 3647 jaraly adam bar ekeni aıtyldy.
2023 jyldyń 7 qazanynan beri Izraıldiń Gaza sektoryna jasaǵan shabýyldaryn saldarynan kóz jumǵan palestınalyqtardyń jalpy sany 50 810-ǵa, jaralanǵandar sany 115 688-ge jetti.
Eske sala keteıik, buǵan deıin BUU Kongonyń 28 mıllıon turǵyny azyq-túlikke muqtaj ekenin habarlaǵanyn jazǵan bolatynbyz.