Gaza úkimeti: Sektorda 20 myń jarylmaǵan oq-dári qaldy
ASTANA. KAZINFORM — Gaza úkimeti Izraıldiń eki jylǵa sozylǵan shabýyldary saldarynan sektor tarıhtaǵy eń iri gýmanıtarlyq daǵdarysqa ushyraǵanyn habarlap, soǵystan keıin 20 myń jarylmaǵan oq-dári qalǵanyn aıtty, dep habarlaıdy Anadoly.
Gaza úkimetiniń baspasóz qyzmeti taratqan málimdemede, Izraıldiń shabýyldarynan keıin Gaza sektorynda 70 mıllıon tonna qırandylar qalǵany aıtylǵan.
Málimdemede Izraıldiń áskerı áreketterinen keıin aımaq qurylys pen ekologııa turǵysynan apat aımaǵyna aınalǵany, sondaı-aq jarylmaǵan 20 myń oq-dáriniń turǵyndar ómirine qaýip tóndirip turǵany atap ótildi. Bul oq-dárilerdi zalalsyzdandyrý úshin arnaıy mamandardan quralǵan toptar qajet ekeni aıtylǵan.
Eki jyldan astam ýaqytqa sozylǵan shabýyldardyń saldarynan Gaza sektory buryn-sońdy bolmaǵan kúıreýge ushyrady.
— 15 qazan, sársenbige deıin alynǵan málimetterge sáıkes, qırandylar kólemi 65–70 mıllıon tonnaǵa jetken. Bul — Izraıl tikeleı qıratqan myńdaǵan úı, nysan men ınfraqurylymnyń qaldyqtary, — delingen habarlamada.
Baspasóz qyzmetiniń málimdeýinshe, qırandylardy tazalaý jumystary úlken qıyndyqtarǵa tap bolyp jatyr. Izraıl tarapynan jasalǵan kedergilerge baılanysty aýyr tehnıka men qajetti qural-jabdyqtar aımaqqa jetkizilmeı otyr.
Tel-Avıv úkimeti shekaralyq ótkizý beketterin jaýyp, úıindi astynda qalǵan múrdelerdi alyp shyǵýǵa qajet qurylǵylardy kirgizýge ruqsat bermeıtin kórinedi.
Eske salsaq, 9 qazanda AQSh prezıdenti Donald Tramp Mysyrda júrgizilgen kelissózder aıasynda Izraıl men HAMAS Gazadaǵy bitim josparynyń alǵashqy kezeńin maquldaǵanyn habarlady.
Kelisim Mysyrda júrgizilgen kelissózder nátıjesinde qol qoıylyp, 10 qazan kúni Izraıl úkimetiniń maquldaýymen kúshine endi.
Kelisimge sáıkes, Izraıl áskeri «sary syzyqtan» shegingennen keıin, sol kúni saǵat 12:00–de Gazada bitim qoldanysqa engizildi.
Izraıldiń eki jylǵa sozylǵan shabýyldarynyń saldarynan Gaza sektorynda 67 967 palestındik qaza taýyp, 170 179 adam jaraqat alǵan.
Budan buryn Izraıl qorǵanys mınıstri Gazada atystyń qaıta jalǵasýy múmkin ekenin málimdedi.