Gaza Sektoryn jan-jaqtan bombalap jatyr
ASTANA. 18 qarasha. QazAqparat - Izraıl osymen besinshi kún qatarynan Gaza Sektoryn bombalaýdy jalǵastyrýda.
Jaýap retinde «HAMAS» Izraılge zymyrandardy ushyrýda. VVS málimetterine qaraǵanda, Gazany endi tek áýeden ǵana emes, sonymen qatar teńizden de bombalap jatqan kórinedi, ıaǵnı oǵan Izraıl áskerı teńiz kúshteriniń kemeleri qosylǵan eken. Bul jaıynda utro.ru habarlap otyr.
Tańerteńgi atys-shabystyń nátıjesinde Gazadaǵy buqaralyq aqparat quraldarynyń ofısteri ornalasqan ǵımarat zardap shekti. Birneshe jýrnalıst jaraqat aldy. Sonymen qatar bosqyndardyń lageri de zardap shekti. Onda bir adam qaza taýyp, 12-si jaraqat aldy, dep jazady AL Jazeera .
«Hamas» bolsa, óz jaǵynan Izraıldi zymyrandarmen atqylaýdy jalǵastyrýda. Tel-Avıvte búgin taǵy da áýe qaýip-qateriniń dabyldary qaǵyldy. Áskerılerdiń aıtýynsha, bir zymyran qalaǵa deıin jetken eken, ony «Temir kúmbez» atty zenıttik júıe qaǵyp túsirgen.
Budan bólek, Izraıl artıllerııalyq soqqyny Sırııanyń aýmaǵyna da baǵyttaǵan.
Qazirgi ýaqytta Izraıl men palestınalyq taraptan bolǵan adam shyǵyny jaıyndaǵy málimetterdi salystyrýǵa kelmeıdi. Zymyrannan Izraılde úsh adam qaza bolyp, ondaǵan adam zardap shekken. Gazada kem degende 47 adam qaza boldy, onyń jartysy beıbit turǵyndar.
VVS málimeti boıynsha, Tel-Avıv ázirge jerústi operatsııasyn bastaýǵa bel býǵan joq. Oǵan deıin barmaýy da múmkin. Qazirgi kezde bitimge kelý boıynsha Mysyrdy ortaǵa alyp, kelissózder júrgizilýde. Kaırdiń usynysy boıynsha Izraıl bombalaýdy, al «Hamas» zymyrandyq atys-shabysty toqtatýy shart. Mysyr Prezıdenti Mohammed Mýrsı Gazada jerústi operatsııasyn bastaýdy qabyldaýǵa bolmaıtyn shara ekenin qatań málimdedi.
