Gaza sektorynyń soltústiginde ınternet pen baılanys tolyǵymen óshirildi

ASTANA. KAZINFORM — Izraıldiń jappaı áýe soqqylaryna ushyrap jatqan Gaza sektorynyń soltústik bóliginde ınternet pen baılanys tolyǵymen ajyratyldy. Bul týraly Palestınadaǵy telekommýnıkatsııalyq kompanııalar habarlady, dep jazady Anadoly.

Málimdemede Gaza qalasy men oǵan kórshiles aımaqtarda, Izraıldiń qorshaýy men áýeden jasalǵan shabýyldarynyń astynda qalyp otyrǵan óńirlerde statsıonarlyq ınternet pen baılanys qyzmetteri tolyǵymen úzilgeni aıtylǵan.

Kompanııalardyń habarlaýynsha, Izraıl armııasy óńirdi ınternet jáne baılanyspen qamtamasyz etip otyrǵan negizgi magıstraldyq jelilerge soqqy bergen, sonyń saldarynan júıe jumysy toqtaǵan.

Alaıda, jalǵasyp jatqan shabýyldarǵa qaramastan, tehnıkalyq mamandar jelini qalpyna keltirý jumystaryn bastap ketkeni de atap ótilgen.

«Anadoly» agenttigine suhbat bergen kýágerlerdiń aıtýynsha, Gaza qalasynyń kóptegen aýdanynda ınternetke múlde qol jetkizý múmkin emes.

Buǵan deıin Izraıl armııasy tún ishinde 50 áýe soqqysyn jasaǵanyn málimdegen bolatyn, olardyń basym bóligi aldyńǵy kúni qurlyqtaǵy shabýyl bastalǵan Gaza qalasyna baǵyttalǵan.

Sondaı-aq, Izraıl tarapy Gaza qalasynda baspana tapqan bosqyndar ornalasqan úıler men kópqabatty ǵımarattardy qıratýmen qatar, turǵyndardy Gaza sektorynyń ońtústigine kúshtep kóshirýge áreket jasap jatqany aıtylǵan. Olar ońtústikte qajetti shatyrlar, azyq-túlik jáne aýrýhanalar bar dep kórsetken.

Budan buryn Qytaı bıligi Izraılden onsyz da qıyn gýmanıtarlyq daǵdarysty odan saıyn ýshyqtyrmaý úshin Gazadaǵy áskerı operatsııany toqtatýdy talap etti.