Gaza sektoryndaǵy polıtsııa bólimshesine áýe soqqysy jasalyp, 9 adam qaza tapty
ASTANA. KAZINFORM — Gaza sektorynda atysty toqtatý týraly kelisimdi júzege asyrýǵa qatysty jaǵdaı áli de shıelenisti bolyp turǵan kezde taǵy soqqy jasaldy, dep Kazinform agenttiginiń menshikti tilshisi habarlady.
Sársenbi kúni Izraıldiń Gaza qalasyndaǵy polıtsııa bólimshesine jasaǵan áýe soqqysynan toǵyz palestınalyq qaza taýyp, taǵy 15 adam jaralandy. Bul týraly medıtsınalyq derekkózderge silteme jasaǵan palestınalyq WAFA agenttigi habarlady.
Agenttiktiń málimetinshe, qaza tapqandardyń deneleri men jaralanǵandar «Ash-Shıfa» medıtsınalyq keshenine jetkizilgen. Jaralanǵandardyń basym bóliginiń jaǵdaıy aýyr dep baǵalanyp otyr.
Gaza sektorynyń Іshki ister mınıstrligi shabýyldyń nysanasy polıtsııa bólimshesi bolǵanyn málimdep, Izraıldi anklavtaǵy jaǵdaıdy turaqsyzdandyrýǵa tyrysty dep aıyptady.
Izraıl qorǵanys armııasy soqqy jasaǵanyn rastady. Izraıl tarapynyń málimdeýinshe, shabýyldyń nysanasy qarýly top músheleri bolǵan. Alaıda ázirge Izraıl tarapy qosymsha málimet bergen joq.
Sársenbi kúni Gaza sektorynyń ortalyq bóligindegi Nýseırat aýdanynda mototsıklge de jeke soqqy jasaldy. Palestınalyq BAQ-tyń habarlaýynsha, saldarynan bir adam qaza tapqan. Izraıl áskeri bul jaǵdaıda da nysana qarýly top múshesi bolǵanyn málimdedi.
18 tamyzdaǵy soqqylardan keıin qaıta shabýyl jasalyp otyr. Seısenbi kúni Izraıl áskerı-áýe kúshteri Gaza qalasynyń batysyndaǵy balyqshylar porty aýmaǵynda ornalasqan kafege soqqy bergen. Jergilikti dárigerlerdiń málimetinshe, alty palestınalyq qaza taýyp, taǵy 14 adam jaralanǵan.
Soǵys bastalǵaly beri port aýmaǵy úı-jaıyn tastap, basqa jerge kóshýge májbúr bolǵan palestınalyq otbasylardyń kóptep ornalasqan jerine aınalǵan.
Izraıl áskeri soqqynyń nysanasy HAMAS qolbasshylary men basqa da qarýly top músheleri bolǵanyn málimdedi. Izraıl tarapynyń aıtýynsha, olar Izraıl áskerı qyzmetshilerine shabýyl jasaýǵa daıyndalyp jatqan.
Izraıl armııasynyń málimetinshe, olardyń biri 2023 jylǵy 7 qazanda Izraılge jasalǵan shabýylǵa qatysqan.
Bul soqqylar AQSh-tyń Gaza sektoryna qatysty josparynyń kelesi kezeńin júzege asyrý máselesine baılanysty taraptar arasynda kelispeýshilikter jalǵasyp jatqan tusta jasaldy. Negizgi daýly másele — HAMAS-tyń qarýsyzdanýy men Izraıl áskeriniń Gaza sektorynan ári qaraı shyǵarylýynyń qaısysy birinshi oryndalýy tıis ekeni.
Jýyrda AQSh prezıdentiniń keńesshisi Djared Kýshner Mysyr men Izraılge baryp, HAMAS ókilderimen jáne Izraıl basshylyǵymen kelissózder júrgizdi.
