Gaza sektoryndaǵy muǵalimniń ómiri
Gaza muǵalimderi táýlik boıy mektepte turady jáne jumysyn jalǵastyrýǵa tyrysady. Olardyń kem degende 130-y qaıtys boldy. Kazinform bul týraly Euronews arnasyna silteme jasap habarlaıdy.
Gaza sektory muǵalimder úshin tozaqqa aınaldy. 7 qazandaǵy HAMAS pen Izraıl áskerıleri shabýylynan keıin mektepter bosqyndarǵa arnalǵan baspanaǵa aınaldy. Education International kásipodaq federatsııasynyń málimeti boıynsha, osy ýaqyt ishinde kem degende 130 muǵalim qaıtys boldy.
Ýmm Ýsama Tabsh otbasymen ózi jumys isteıtin mektepte bir aıdan astam ýaqyt turyp jatyr.
«Men qorqynyshty tús kórip jatqan sııaqtymyn. Al shynynda kún saıyn kelip, oqýshylarymdy oqytatyn, olarmen qyzyqty ýaqyt ótkizetin jerde turyp jatyrmyn», - deıdi muǵalim.
Qazir Gaza sektorynda 625 myń oqýshy men stýdent bilim alý múmkindiginen aıyrylǵan.
«Soǵys bastalyp, bomba men zymyran atqylaı bastaǵanda aǵam ekeýmiz mektepke barýǵa daıyndalyp jatqanbyz. Biz mektepke oqýǵa barýdyń ornyna, búkil otbasymyzben bas saýǵalap osy jerge keldik».
«Men bul jerde bolǵanyma 31 kún boldy. Bul jer qonys aýdarǵandar úshin baspana bolǵandyqtan ǵana emes, kóptegen shákirtimnen aıyrylǵandyqtan turyp jatyrmyn. Men olardy oqyttym, al olar Izraıl shabýylynan qaza tapty», - deıdi Ýmm Ýsaba Tabsh.
Gaza Densaýlyq saqtaý mınıstrligi qaza bolǵandar sanyn kún saıyn jańartyp otyrady. Onyń málimetinshe, Izraıl soqqysy bastalǵannan beri sektorda 4400-den astam bala qaza tapqan. Izraıl jaǵynda da kóptegen bala qaza tapty, al bıliktiń aıtýynsha, HAMAS kepilge alǵan 240 adamnyń arasynda balalar, tipti sábıler de bar.
