Gaza sektoryndaǵy Qazaqstan azamattarynyń naqty sanyn aıtý múmkin bolmaı tur - mınıstrlik
Qazaqstan azamattaryn Gaza sektorynan shyǵarý jumystary boıynsha kelissóz júrip jatyr. Bul týraly Syrtqy ister mınıstriniń birinshi orynbasary Qaırat Omarov aıtty, dep habarlaıdy Kazinform.
«Bizdiń dıplomatııalyq ókildik Gaza sektoryndaǵy Qazaqstan azamattarymen turaqty baılanysta. Atap aıtqanda, osy aýmaqtan azamattarymyzdy aman-esen shyǵaryp alý maqsatynda Mysyr úkimetimen de jáne basqa da resmı tulǵalarmen birlese jumys istep jatyrmyz. Qazir 45 memleket óz azamattaryn shyǵaryp alýǵa talpynyp otyr. Ázirge, birde-bir shetel azamaty osy óńirden shyǵa almady. Sondyq jumysty jalǵastyryp jatyrmyz», - dedi Q. Omarov Senattyń jalpy otyrysynan keıin tilshiler suraǵyna jaýap bere otyryp.
Onyń aıtýynsha, qazir Gaza sektoryndaǵy turǵyndarǵa gýmanıtarlyq kómek jasaýǵa erekshe mán berilip otyr. Osy óńirge gýmanıtarlyq júk tıelgen kólikter ótkizilip jatyr.
«Ol jerde jaǵdaı óte kúrdeli. Qaqtyǵys aýmaǵynda elimizdiń naqty neshe azamaty qalǵany turaly málimetti anyqtap jatyrmyz. Baılanysqa shyqpaı jatqandary da bar jáne buǵan deıin aty atalmaǵan basqa adamdar da anyqtalyp otyr. Sondyqtan qazir naqty adam sanyn aıtý múmkin bolmaı tur. Ótkizý beketi ashylyp, azamattardy shyǵaryp alsaq, olardyń azamattyǵyn anyqtaımyz», - dedi mınıstrdiń orynbasary.
Budan buryn habarlanǵandaı, Gaza sektorynda Qazaqstan azamaty mert boldy.
Bıyl 16 qazan kúni Syrtqy ister mınıstrliginiń resmı ókili Aıbek Smadııarov Izraıldegi Qazaqstannyń elshiligine 100-den astam elimizdiń azamaty járdem kórsetý týraly ótinish jasaǵanyn aıtty. Sonymen qatar, Gaza sektorynan taǵy 100-den astam adamdy Qazaqstanǵa jetkizý máselesi pysyqtalyp jatyr.
