Gaza sektoryndaǵy Izraıl shabýyldarynan bir táýlikte tórt adam qaza tapty

ASTANA. KAZINFORM – Oq atýdy toqtatý rejımine qaramastan, Izraıl armııasynyń Gaza sektoryna jasaǵan shabýyldarynan sońǵy 24 saǵatta tórt palestınalyq qaza taýyp, taǵy alty adam jaralandy. Jalpy, 2023 jylǵy qazannan beri qaza tapqandardyń jalpy sany 74 699-ǵa jetti. Bul týraly Anadolu agenttigi habarlady.

Gaza sektoryndaǵy Izraıl shabýyldarynan bir táýlikte tórt adam qaza tapty
Foto: Anadolu agenttigi

Gaza sektoryndaǵy Densaýlyq saqtaý mınıstrligi Izraıldiń 2023 jylǵy qazannan beri Palestına anklavyna jasaǵan shabýyldarynan qaza tapqandar men zardap shekkender sany týraly sońǵy málimetterdi jarııalady.

Vedomstvonyń jazbasha málimdemesine sáıkes, sońǵy táýlikte tórt palestınalyq kóz jumǵan. Olardyń arasynda buǵan deıin Izraıl soqqylarynan jaralanǵan bir adam bar. Taǵy alty adam jaraqat alǵan.

2025 jylǵy qazanda atysty toqtatý rejımi kúshine engennen beri Izraıl shabýyldarynan 1 647 adam qaza taýyp, 5 969 adam jaralanǵan. Osy kezeńde úıindiler astynan 850 adamnyń máıiti shyǵarylǵan.

2023 jylǵy qazannan beri Gaza sektoryndaǵy Izraıl shabýyldarynan qaza tapqandardyń jalpy sany 74 699 adamǵa, jaralanǵandar 176 098 adamǵa jetti.

Málimetke sáıkes, Gaza sektoryndaǵy qıraǵan ǵımarattardyń úıindileri astynda áli de myńdaǵan adamnyń máıiti jatyr.

Eske sala ketsek, buǵan deıin Gazadaǵy 70 myń shatyrdy sý basyp, Palestına BUU-dan shuǵyl kómek suraǵan edi.

Al keshe Memleket basshysy Qasym-Jomart Toqaev Palestına Prezıdentine jedelhat joldap, eldiń Táýelsizdik kúnimen quttyqtady.