Gaza sektoryndaǵy gýmanıtarlyq ahýal áli de kúrdeli
ASTANA. KAZINFORM - Atysty toqtatý rejımi jarııalanǵanyna qaramastan, Gaza sektoryndaǵy gýmanıtarlyq jaǵdaı áli de kúrdeli, ásirese balalardyń jaǵdaıy alańdatarlyq. Bul týraly BUU Balalar qorynyń (ıÝNISEF) Palestınadaǵy baspasóz hatshysy Kazem Abý Halaf málimdedi, dep habarlaıdy Anadolu Ajansı.
Agenttik taratqan málimetterge qaraǵanda, Gaza sektoryndaǵy beıbit turǵyndardyń, eń aldymen áıelder men balalardyń jaǵdaıy qıyn. Abý Halaf 2023 jyldyń qazan aıynan beri bul aýmaq aýqymdy shabýyldarǵa ushyrap, qıraǵanyn eske saldy.
— Taratylǵan málimetterge qaraǵanda, atysty toqtatý rejımi jarııalanǵannan keıin de 80-nen astam bala qaza bolǵan. Kúnniń sýytýy da balalardyń jaǵdaıyn qıyndatyp otyr. Aýa temperatýrasy birtindep tómendep, shatyrlardy sý basqany týraly habarlar de kelip túsip jatyr. ıÝNISEF pen basqa da gýmanıtarlyq uıymdardyń muqtaj jandarǵa kómektesýge kúsh-jigerine qaramastan, jaǵdaı áli de óte aýyr kúıinde qalyp otyr, — dedi ol.
ıÝNISEF ókili eki jylǵa jýyq ýaqytqa sozylǵan shabýyldardan eń kóp zardap shegip otyrǵan balalar ekenin atap ótti. Onyń sózinshe, olar adam aıtqysyz fızıkalyq jáne psıhologııalyq qıyndyqqa tózýge májbúr. Izraıl shabýyldary saldarynan 20 myńnan astam bala qaza taýyp, taǵy 44 myńnan astamy jaraqat alǵan.
Bul daǵdarys balalardyń densaýlyǵyna ǵana emes, psıhoemotsıonaldyq jaǵdaıyna da qatty áser etip jatyr.
Sondaı-aq Abý Halaf Dúnıejúzilik densaýlyq saqtaý uıymynyń (DDSU) derekterine silteme jasap, gazalyqtar gýmanıtarlyq kómekke asa zárý ekenin aıtty. Shamamen tórt myń bala medıtsınalyq kómek alý úshin shuǵyl evakýatsııalaýdy qajet etedi.
Ol Gaza sektoryndaǵy 36 aýrýhananyń tek 18-i ǵana ishinara jumys istep turǵanyn atap ótti. Bul jaǵdaı medıtsınalyq evakýatsııany qajet etetin naýqastar sanynyń artýyna sebep bolyp otyr.
ıÝNISEF ókili BUU qurylymdary ázirlegen Azyq-túlik qaýipsizdigi kezeńderiniń ıntegratsııalanǵan jiktemesi (IPC) ótken jyldyń tamyz aıynda Gazada ashtyq bastalǵanyn jarııalaǵanyn eske saldy.
Onyń aıtýynsha, IPC-tiń jańa baıandamasynda ashtyq ýaqytsha toqtatyldy dep kórsetilgenimen, jaǵdaı áli qıyn.
— Baıandamada Gaza sektory halqynyń 77 paıyzy áli de azyq-túlikke zárý ekeni aıtylǵan. Shamamen 101 myń bala jetkiliksiz tamaqtanýdan zardap shegýi múmkin. Sonymen qatar 37 myńǵa jýyq júkti jáne emshektegi balasy bar áıel azyq-túlik kómegine muqtaj, — dedi Abý Halaf.
Onyń sózinshe, atysty toqtatqannan keıin gýmanıtarlyq kómektiń kólemi artqan, alaıda bul jetkiliksiz. Sondaı-aq kúnniń kúrt sýytýy men jaýyn-shashynnyń kóbeıýi de anklavtaǵy jaǵdaıdy qıyndatyp otyr.
— Qanshalyqty berik bolǵanymen, shatyrlar nóser jaýynǵa tótep bere almaıdy. Aýa temperatýrasynyń tómendeýi, qıraǵan ınfraqurylym, ishinara jumys istep turǵan aýrýhanalar men dári-dármektiń tapshylyǵynan túrli aýrýlar tarap jatyr. Bul ásirese, jas balalardyń álsiz aǵzasyna aýyr tıip otyr. Keıbir derekterge sáıkes, keminde 19 bala tek sýyqtan, al taǵy 165 bala jetkiliksiz tamaqtanýdan kóz jumǵan, — dedi ıÝNISEF ókili.
Osyǵan deıin BUU Bas hatshysy Gaza sektorydaǵy ashtyq qaýpi ýaqytsha seıilgeni týraly aıtqan edi.