Gaza sektoryndaǵy aýyr naýqastanǵan palestınalyqtar Túrkııaǵa jetkizildi
Túrkııa Densaýlyq saqtaý mınıstrligi Gaza sektoryndaǵy aýyr jaraqat alǵan palestınalyqtardy túrik medıtsınalyq mekemelerine jetkizý gýmanıtarlyq áreketin jasady, dep habarlaıdy Kazinform.
Mınıstrlik óz kezeginde soǵys kezinde zardap shekken palestınalyqtarǵa medıtsınalyq kómek kórsetý máselelerin talqylaýǵa arnalǵan kezdesýler, dıplomatııalyq baılanystar nátıje bergenin atap ótti.
Mundaı shara alǵash ret júzege asyrylyp otyr. Gaza sektorynan shyǵarylǵan naýqastar Mysyr arqyly Túrkııaǵa keldi. Olar Túrkııanyń densaýlyq saqtaý mınıstri F.Kodjamen birge Túrkııa prezıdenti ákimshiligi men ulttyq qorǵanys mınıstrligine tıesili arnaıy ushaqpen jetkizildi.
Ushý kezinde Túrkııa densaýlyq saqtaý mınıstri F.Kodja palestınalyq naýqastarmen jeke tanysty. Ol budan bylaı túrik tarapynyń Gaza sektoryndaǵy sozylmaly dertke shaldyqqandar men aýyr jaralanǵan palestınalyqtardy Túrkııaǵa jetkizýge bar kúsh-jigerin salatynyn basa aıtty.
Oraq jasýshaly anemııamen aýyratyn 17 jastaǵy Mahmýd Kadır Ibrahım Ebý Nedanyń em alyp júrgenine 10 jylǵa jýyq ýaqyt bolǵan. Ol Gaza sektoryndaǵy Túrik-Palestına dostyq aýrýhanasynan em alǵan. Medıtsınalyq mekemege shabýyl jasalǵan kezde ol jáne basqa naýqastar sol aýrýhanada bolǵan. Jarylystan keıin ne isterlerin bilmeı abdyrap qalǵan naýqastar endi em alýdy Túrkııada jalǵastyrady.
