Gaza sektoryndaǵy ahýal: Arab memleketteri lıgasy BUU-ǵa jańa úndeý jasady
ASTANA. KAZINFORM - Arab memleketteri lıgasy (AML) Birikken Ulttar uıymynyń Qaýipsizdik keńesine (BUU QK) Izraıldiń Gaza sektorynda shabýyldaryn toqtatýǵa qatysty sheshim qabyldaýǵa úndedi, dep habarlaıdy Anadolu Agency.
AML Palestınanyń úndeýimen óziniń turaqty ókilderiniń shuǵyl jıynyn ótkizdi. Marokkonyń tóraǵalyǵymen ótken otyrys AML-dyń Kaırdegi shtab-páterinde ótti.
«AML BUU Qaýipsizdik keńesinen halyqaralyq beıbitshilik pen qaýipsizdikti saqtaý mindetterin oryndaýyn jáne Izraıldiń Palestına halqyna qarsy júıeli jáne aýqymdy qylmystaryn toqtatý úshin mindetti sheshim qabyldaýyn talap etti», — delingen AML otyrysynyń qorytyndysy boıynsha málimdemede.
AML Qurama Shtattar men BUU Qaýipsizdik keńesinde qos standarttardy qoldanyp, Izraıl basqynshylyǵyn qoldaıtyn elderdi halyqaralyq quqyqqa sáıkes ustanymda bolýǵa jáne Gaza sektorynda atysty tolyq jáne turaqty túrde toqtatýǵa shaqyrdy.
Budan basqa, BUU Qaýipsizdik Keńesine múshe elderdi Izraıldiń Palestına halqyna qarsy shabýyldaryn toqtatý, Gaza sektorynan ketý, eksklavtyń qorshaýyn alyp tastaý jáne onyń palestınalyqtardy májbúrli kóshirý boıynsha josparlary men kúsh-jigerine tosqaýyl qoıýdy toqtatatyn ustanym tanytýǵa úndedi.
Arab memleketteri lıgasy, sondaı-aq, Izraıldiń basyp alynǵan Batys jaǵalaýdaǵy qylmystarynyń kúsheıýin, sonyń ishinde palestınalyq bosqyndar lagerleri men ınfraqurylymdaryn júıeli túrde qıratýyn, sondaı-aq Izraıldiń «Ál-Aqsa» meshitin 100 kúnnen astam qorshaýyn aıyptady.
Sonymen qatar, habarlamada Halyqaralyq qylmystyq sotta Izraıldiń áreketterin Palestına halqyna genotsıd dep taný týraly Ońtústik Afrıka Respýblıkasynyń Izraılge qarsy shaǵymy qanaǵattandyrylǵanyna rızashylyq bildirilip, Izraıl jazadan qutylmaýy úshin oǵan qatysty kóp shaǵym túsirý úndeýi aıtyldy.
AML halyqaralyq sottardy qandaı da bir saıası ıdeıalar yqpalyna túspeı, shaǵymdar boıynsha isterdi tezirek tergep, sheshim qabyldaýǵa shaqyrdy. Palestınanyń AML-daǵy turaqty ókili Mýhenned ál-Aklıýktiń 17 qańtarda habarlaýynsha, Ramalla AML-dy Izraıl shabýyldary boıynsha shuǵyl otyrys uıymdastyrýǵa úndedi.
