Gaza sektoryndaǵy 500 myń adam BUU kómeginen qaǵylady
ASTANA. KAZINFORM — Qystyń jaqyndaýyna baılanysty halyqaralyq qarjynyń jetispeýi Gaza sektoryndaǵy turǵyndarǵa gýmanıtarlyq kómek kórsetý máselesin kúrdelendirip otyr, dep habarlaıdy Kazinform agenttiginiń menshikti tilshisi.
BUU-nyń Dúnıejúzilik azyq-túlik baǵdarlamasy 19 qazanda Gaza sektorynda aı saıyn tamaqpen jáne aqshalaı qarajatpen kómek alatyn turǵyndar sanyn 1,6 mıllıonnan 1,1 mıllıonǵa deıin azaıtatynyn habarlady.
Uıymnyń resmı málimdemesine sáıkes, qarjy tapshylyǵyna baılanysty kómek alýshylar sany qysqaryp, 500 myńǵa jýyq palestınalyq qoldaýsyz qaldy.
🚨 Due to funding shortages, WFP is forced to reduce food assistance in Gaza by around one-third, meaning half a million people will lose access to critical aid. The cuts come as winter approaches and the recent modest improvements in food security remain fragile. From this month, we are supporting 1.1 million of the most vulnerable people in Gaza with food and cash assistance, down from 1.6 million last month. Food rations will also be cut by half. WFP urgently calls for additional funding in order to keep reaching the most vulnerable in Gaza and the West Bank.
— World Food Programme (@WFP) October 19, 2026
Budan bólek BUU-nyń Dúnıejúzilik azyq-túlik baǵdarlamasy beriletin azyq-túlik kómegin eki ese azaıtty. Budan bylaı ár otbasy eki jıyntyqtyń ornyna bireýin ǵana alyp, burynǵydan az mólsherde bıdaı unymen qamtamasyz etiledi.
Kúndelikti taratylatyn ystyq tamaq sany 250 myńnan 150 myńǵa deıin qysqardy. Izraıl áskeriniń baqylaý syzyǵyna jaqyn, qatynaý qıyn aýdandarda tamaq kúnara beriledi. Sonymen qatar 75 myń otbasyna tólenetin aqshalaı kómektiń mólsheri azaıtyldy.
BUU-nyń Dúnıejúzilik azyq-túlik baǵdarlamasynyń baǵalaýynsha, Gaza sektorynyń 1,4 mıllıonǵa jýyq turǵyny, ıaǵnı halyqtyń 67 paıyzy azyq-túlik tapshylyǵynyń aýyr zardabyn tartyp otyr. Olardyń 200 myńǵa jýyǵy ashtyqtan bolatyn ólimniń aldyn alý úshin shuǵyl azyq-túlik kómegine muqtaj.
Gaza sektoryndaǵy balalardyń tek 20 paıyzy ǵana qunarly ári alýan túrli taǵammen jetkilikti qamtamasyz etilgen. Al jumyssyzdyq deńgeıi 80 paıyzdan asyp otyr. Bazarlarda azyq-túlik satylǵanymen, kóptegen otbasynyń jańa pisken kókónister men jemisterdi, sondaı-aq aqýyzǵa baı ónimderdi satyp alýǵa múmkindigi joq.
BUU Dúnıejúzilik azyq-túlik baǵdarlamasy basshysynyń mindetin atqarýshy Karl Skaý Gaza sektoryna barǵan saparynda atysty toqtatý týraly kelisimge qol qoıylǵanyna bir jyl ótse de, jergilikti halyqtyń turmys jaǵdaıy áli de aýyr ekenin málimdedi. Bul týraly Reuters agenttigi habarlady.
— Atysty toqtatý týraly kelisimge qol qoıylǵanyna bir jyl ótse de, Gaza turǵyndarynyń jaǵdaıy áli de aýyr. Halyq baspanaǵa, negizgi qyzmetterge jáne qaýipsizdikke zárý, — dedi ol.
Kómek kólemi soǵys bastalǵaly bergi tórtinshi qystyń qarsańynda qysqaryp otyr.
Uıymnyń málimetinshe, 2025 jylǵy qazanda atysty toqtatý rejımi ornaǵannan keıin gýmanıtarlyq kómektiń qoljetimdiligi artyp, azyq-túlik daǵdarysy birshama báseńdegen.
2025 jyldyń sońynda Gaza sektorynyń 1,6 mıllıon turǵyny nemese halyqtyń 77 paıyzy azyq-túlik tapshylyǵyna tap boldy. Degenmen jaǵdaıdyń jaqsarýy mardymsyz, al qarjy kólemi odan ári qysqarsa, bul ózgerister qaıtadan keri ketýi múmkin.
BUU-nyń Dúnıejúzilik azyq-túlik baǵdarlamasy Gaza sektorynyń nanǵa degen suranysynyń úshten birin óteıtin naýbaıhanalardy qoldaýdy, 300 myń áıel men balaǵa arnaıy taǵam berýdi jáne 200 myń oqýshyny mektepte jeńil tamaqpen qamtamasyz etýdi jalǵastyryp otyr.
Qarjy tapshylyǵy Iordan ózeniniń batys jaǵalaýyna da áser etti. Qyrkúıek aıynda munda kómek alýshylar sany eki ese qysqaryp, 400 myńnan 200 myń adamǵa deıin azaıdy.
2026 jyly Palestına aýmaqtaryndaǵy gýmanıtarlyq operatsııalarǵa bólingen qarjy kólemi aldyńǵy jyldarmen salystyrǵanda eki eseden astam qysqardy.
Gaza sektory men Iordan ózeniniń batys jaǵalaýyndaǵy negizgi gýmanıtarlyq baǵdarlamalardy jalǵastyrý úshin uıymǵa 2026 jylǵy qazannan 2027 jylǵy naýryzǵa deıingi alty aıǵa 450 mln dollar qajet.
Gaza sektorynyń úkimettik medıa keńsesi BUU-nyń Dúnıejúzilik azyq-túlik baǵdarlamasynyń bul sheshimin apatty jaǵdaı dep baǵalap, azyq-túlik kómeginiń qysqarýy óńirde ashtyqtyń taralýyn jedeldetýi múmkin ekenin eskertti.
AQSh-tyń araaǵaıyndyǵymen 2025 jylǵy qazanda jasalǵan atysty toqtatý týraly kelisimniń oryndalýy baıaý júrip jatyr. Izraıl áskeri Gaza sektory aýmaǵynyń 60 paıyzdan astamyn baqylap, áýe shabýyldaryn kún saıyn jalǵastyryp júr.
Osyǵan baılanysty palestınalyqtardyń edáýir bóligi ýaqytsha baspanalardy panalap, azyq-túlik pen medıtsınalyq kómekke, sondaı-aq negizgi kommýnaldyq qyzmetterge muqtaj.
Buǵan deıin Gazany qalpyna keltirý jáne qaıta qurýǵa $71,5 mlrd qajet ekenin habarlaǵan edik.
