Gaza sektorynda janarmaı tapshylyǵyna baılanysty aýrýhanalar jumysyn toqtatýǵa májbúr
ASTANA. KAZINFORM — Izraıl shabýyldarynyń jalǵasýy jáne janarmaı tapshylyǵy jaǵdaıynda Gaza sektoryndaǵy aýrýhanalar jaqyn kúnderi tolyqtaı jumysyn toqtatýy múmkin. Bul týraly Gaza sektoryndaǵy Densaýlyq saqtaý mınıstrligi málimdedi, dep jazdy Anadoly agenttigi.

Mınıstrliktiń málimdemesinde ızraıldik áýe shabýyldary, sondaı-aq gýmanıtarlyq kómek pen janarmaı jetkizýge qoıylǵan shekteýler Gaza aýrýhanalaryn tolyq toqtap qalý qaýpine ákelip otyrǵany atap ótilgen.
— Janarmaı qorynyń taýsylýyna baılanysty aýrýhanalardyń jumysyn toqtatý úshin sanaýly kúnder ǵana qaldy. Gaza sektoryndaǵy medıtsına mekemelerindegi janarmaı daǵdarysy óte qaýipti deńgeıge jetti, — delingen málimdemede.
Mınıstrlik Izraıldiń qorshaý jaǵdaıynda ómirlik mańyzy bar bólimshelerdiń jumysyn toqtatýy gýmanıtarlyq apatty ýshyqtyratynyn, al naýqastar men jaralylardyń ómirine tikeleı qaýip tónetinin málimdedi.
Sondaı-aq, aýrýhanalarǵa janarmaı jetkizýge tyıym salynýyna baılanysty medıtsınalyq qyzmet kórsetýde úzilister bastalyp ketkeni, al adamdardyń ómirin qutqarý barǵan saıyn múmkin bolmaı bara jatqany atap ótildi.
— Gýmanıtarlyq apattyń aldyn alý úshin aýrýhanalarǵa dereý janarmaı jetkizilýi tıis, — delingen málimdemede.
Gazada áli jumys istep turǵan medıtsınalyq mekemelerde apparattar men ómirdi qoldaýshy júıelerge elektr energııasy tek janarmaımen jumys isteıtin generatorlar arqyly berilip otyr.
Izraıl engizgen gýmanıtarlyq kómek, dári-dármek jáne janarmaı jetkizýge qoıylǵan shekteýler apparattyq em alyp jatqan naýqastar men jaralylardyń ómirin úlken qaýipke tiredi.
2023 jylǵy 7 qazannan beri Izraıldiń Gaza sektoryna jasaǵan shabýyldarynyń saldarynan keminde 65 344 palestındik qaza taýyp, taǵy 166 795 adam jaraqat alǵan.
BUU Bas hatshysy Bas Assambleıada BUU-nyń 80 jyldyǵyna arnalǵan saltanatty jıynda sóılegen sózinde Taıaý Shyǵystaǵy jaǵdaı tózgisiz jáne saǵat sanap nasharlap bara jatqanyn aıtqan edi.